2010 senesi 16 avgust künü qırımtatar Meclis ofisinde Meclisiniñ tış bağlar bölüginiñ yolbaşçısı Ali Hamzin ve Meclis Kãtipliginiñ yolbaşçısı Zair Smedlãyev İvan Sirko adına Kazak hayriye fonfunıñ vekilleri Sergey İvançenko, Vladislav Ladıgin, Aleksandr Lozanen körüştiler. Körüşüvde fondnıñ Qırımdaki temsili Sergey Şurko da bulundı.
Evelden ‘Siçeslav’ adını taşığan İ.Sirko adına Kazak Hayriye fondu bugünde Dnepropetrovsk, Poltava, Kirovograd vilãyetleriniñ kazak teşkilãtlarını birleştire, onıñ Kiyev, Aqmescitte ve Zaporojye vilãyetlerinde de temsilcilikleri bar.
Subet devamında Ali Hamzin ve Zair Smedlãyev sürgün etilgen qırımtatar halqınıñ tarihı aqqında, Vatanlarına avdet devrindeki küreş, Qırımda ve Ukrainadaki zemaneviy vaziyeti aqqında ikãye ettiler. Sergey İvançekno ise Zaporoj Seçiniñ medeniy mirasınıñ ögrenüvi ve inkişafı boyunca, zemane yaşlarda mesüliyetlik, vatanperverlik kibi duyğularını aşlaması boyunca büyük iş yapqan İ.Sirko adına Kazak Hayriye fonfunıñ faaliyeti aqqında tarif etti. O böyle qayd etti: ‘ Qırmtatar ve ukrain halqları arasında qardaşlıq munasebetleriniñ şanlı tarihında qaramaniy saifeler bar. 1649 senesi Joltıye vodı(Sarı Suv özeni), soñra da Konotop yanında beraber keçirgen uruşlar Ukraina devleti ve milletiniñ şekillenmesine büyük isse qoştılar. Biz bunu er vaqıt minnetdarlıq ile hatırlaymız ve bugün biz adetiy bağlarımıznı inkişaf etmek ve qaviyleştirmek, medeniy almaşuvnı kenişletmek,umumiy tarihımıznı ögrenmek kerekmiz.’ Vladislav Ladıgin öz nevbetinde, qırımtatar ve ukrain halqlarnıñ tarihında facialı saifeler de çoq olğanını qayd etti. Bu şunu tasdiqlay ki, halqlarımız beraber olğanda ğalebe qazanalar ve bundan dolayı biz birleşme ve dostluqqa ıntılmalımız.
Subetniñ soñunda eki taraf da qırımtatar Meclisi ve kazak teşkilãtları arasında daimiy bağlarnı teşkil etmek meselesini ögrenilmesi aqqında añlaştılar. Vladislav Ladıgin Fond adından qırımtatar Meclisini ofislerini ziyaret etmege davet etti.
Bundan soñ körüşüv iştirakçileri ‘Aqmescit’ kinoteatri yanında yerleşken Pötr Grigorenkonıñ abidesini ziyaret etip, ukrain halqınıñ qaramanı ve qırımtatar halq dostunıñ hatırasını sükünet daqqasınen şereflediler.
Meclisniñ matbuat hızmeti