2010 senesi 16 yanvarda Qırım mühendislik pedagogika üniversitetiniñ (QMPÜ) konferents zalında Bütündünya qırımtatar kongressiniñ(BQK) azaları- qırımtatar cemaat teşkilãtları yolbaşçılarınıñ körüşüv- müşaveresi olıp keçti.
Körüşüvniñ iştirakçileri BQK Prezidenti Refat Çübarov ve Koordinatsıon keñeşiniñ azaları- Ayşe Seytmuratova, Ali Hamzin ve Fevzi Yaqubov ile Bütündünya qırımtatar kongressi tarafından qoyulğan konkret vazifeleriniñ eda etilmesine doğrulğan ortaqlıq leyhalarını amelge keçirilmesi ve azırlanuvı ile bağlı suallerini muzakere ettiler.
Gumanitar saasında eñ-evelã çezilmesi kerek leyhalar olaraq, bütün dünyağa darqalğan qırımtatarlarınıñ serberst qonuşmaları içün kommunikatsıon imkãnlarınıñ meydanğa ketirilmesine ayrıca diqqat etildi.
Böyle leyhalarnıñ arasında- qırımtatar tiliniñ latin hurafatı esasında yekãne elifbesiniñ soñ variantını tasdiqlanması, devlet mekteplerde qırımtatar tilinde öz balalarını terbiye etmek imkãnları olğan memleketlerinde, şu cümleden Romanya ve Bolğariyada, mektep tasil sistemasına kirsetilmesi içün kelişken edebiy qırımtatar tiliniñ umumiy normaları boyunca kelişilmesi közde tutulğan.
Muşavere iştirakçileri şunı da qayd ettiler ki, bu yönelişte umummilliy gazetanıñ çıqarılması ve onı internette yerleştirilmesi, balalar içün bediy ve bilgi ve eglence edebiyatını neşir etmek ve darqatmaq maqsadı ile yazıcılar ve naşırlardan ibaret mahsus icadiy birleşmeniñ meydanğa ketirilmesi, ATR telekanalı ve ‘Qırım’ devlet teleradiokampaniyasınıñ qırımtatar yayınlarını on-layn tarzda kösterilmesini teşkil etilmesi bu yönelişte bayağı effektiv olur.
Körüşüv iştirakçileriniñ bir qısmı içtimaiy-iqtisadiy ve siyasiy-huquq meseleleriniñ çezilmesi , şu cümleden qırımtatar içtimaiy teşkilãtları tarafından BQK çerçivesinde amelge keçirilgen leyhalarını destekleycek mahsus fondnıñ meydanğa ketirilmesiniñ zarurlığını ayrıca qayd ettiler.
Azırlanılğan leyhalar ve muşaverede muzakere etilgen diger suallerni BQK Koordinatsıon keñeşiniñ toplaşuvında baqılması ve qarar berilmesi içün çıqarılması közde tutula. Mezkür toplaşuvnı ise 2010 senesi martnıñ başında Türkiyede keçirilmesi planlaştırıla. Şusı quvançlı ki, bir sıra azırlanılğan leyhalar Qırımda faaliyet köstergen qırımtatar cemamat teşkilãtlarınıñ öz quvetleri sayesinde artıq amelge keçirilmekte.
Muşavere iştirakçileri, bundan da ğayrı, leyhalarını azırlanuvı ve baqılması boyunca ilerideki işiniñ tertibini muzakere ettiler. Endi Koordinatsıon Keñeşiniñ azaları beraber çalışmaq içün aftada bir kere( Cuma künleri, saat 15-17 qadar, Jıdkova, 40 adresi boyunca) qırımtatar cemaat teşkilãtları ile ve ayda bir kere- Qırım mühendislik pedagogika üniversitetinde keñiş körüşüv keçirecekler.
Qırımtatar cemaat teşkilãtlarınıñ temsilleri ve diger meraqlanğan şahıslar işbirlik ve BQK Koordinatsıon Keñeşiniñ azaları ile leyhalarını azırlanuvınen bağlı sualler boyunca 066 614 20 56 telefonı ile Ali Hamzinnen bağlana bileler.
BQK Koordinatsıon Keñeşi