2010 senesi 21 sentâbr künü Kiyevde qırımtatar halqı Meclisiniñ reisi Mustafa Cemilevniñ Avropa Şurasınıñ Parlament Assambleyasınıñ Prezidenti Mevlüt Çavuşoğlu ile körüşüvi olıp keçti.
M. Çavuşoğlu Mustafa Cemilevge Ukraina Prezidenti ve Ukraina Parlamentiniñ spikeri ile olıp keçken körüşüvler aqqında haber etti. Şu körüşüvler ketişatında qırımtatar halqınıñ uquqlarını yañıdan tiklev meseleleri, hususan Ukraina YŞ tarafından ‘Milliy alâmetke köre sürgün etilgen şahıslarnıñ uquqlarını yañıdan tiklenüvi aqqında’ qanunnıñ proektini közden keçirme perspektivaları ve qabul etüv meseleleri baqıldı.
Öz nevbetinde Mustafa Cemilev AŞPA Prezidentine qırımtatarlar ile bağlı soñki eñ muim vaqialar aqqında, aynı zamanda qırımtatar halqı Qurultayınıñ soñki sessiyası aqqında, ve bu seneniñ avgust ayında qırımtatar halqı Meclisiniñ Ukraina Prezidenti V. Yanukoviç ile körüşmegeniniñ sebepleri aqqında tarif etti.
Körüşüv iştirakçileri aynı zamanda qırımtatar halqı Qurultayı tarafından teşebbüs etilgen, Qırım ve qırımtatarlarnıñ meseleleri boyunca Halqara forumnıñ keçirilme imkâniyeti ile bağlı meselelerni de muzakere ettiler. Bundan da ğayrı M. Çavuşoğlu Prezidentine Qurultaynıñ soñki sessiyasından ingliz tilinde bazı malümatlar tarif etildi.
Meclisniñ Matbuat hızmeti