Hatıra künü

11.05.20160:19

2010 senesi 23 avgustta Aqmescitte ‘Salgirka’ rahatlıq bağçasında Sürgünlik qurbanlarına memorial yanında Stalinizm ve natsizm qurbanlarınıñ umumavropa hatıra kününe bağışlanılğan informatsıon piket olıp keçti.

Piket qırımtatar Meclisi, yaşlar cemaat teşkilãtları ve milliy-demokratik birleşmeler ile birlikte teşkil olundı.

Belli olğanı kibi, 2009 senesi 3 iyülde Vilnüs şeerinde OBSYE (AİHT) Parlament Assambleyası tarafından ‘ Bölüngen Avropanıñ birleşmesi: XXI asırda AİHT regionında insan haqları ve vatandaşlıq serbestliklerniñ teşviqatı’ rezolütsıyası qabul olunğan edi.

Mezkür rezolütsıyasınıñ 3 maddesinde XX asırda avropa memleketleri, artından insan haqları ve serbestlikleriniñ bozuluvı, arbiy cinayetler ve insaniyetlikke qarşı cinayetlerni qardırğan eki küçlü — natsist ve stalin totalitar rejimini keçirgenlerini qayd etile.

10 madde Avropa parlamentiniñ 23 avgust kününi, yani ‘Ribbentrop-Molotov’ paktınıñ imzalanma kününi Stalinizm ve natsizm qurbanlarınıñ umumavropa hatıra künü olaraq ilãn etmek teşebbüsini hatırlata.

Totalitar rejimlerini öz başından keçirgen qırımtatar halqı içün böyle kün diqqatsız qaldırılmaz. Yazıq ki, bu sene böyle piketniñ keçirilmesi vaqtında provakatsıyalar yüz berdi. Er alda ukraina ve qırımtatar milliy areket iştirakçileriniñ dostluq munasebetlerini bozmaq niyeti ile memorial üstünde ‘Qırım -tatarlarınıñ degil, ukrainlerniñdir. Ukrainağa şeref!’ kibi yazılar bar edi. Amma, qırımtatarlar böyle kibi provakatsıyalar peşinden ketmezler, çünki olar dostluq munasebetlerini kerçek işlerge köre quralar.

______________________________________________________________________________________

Stalinizm ve natsizm qurbanlarınıñ umumavropa hatıra kününe

bağışlanılğan Umumqırım aktsıyası- informatsıon piketniñ

Rezolitsıyası

1939 senesi 23 avgust künü Moskvada Sovet Birligi ve Almaniya arasında ‘Ribbentrop- Molotov adını’ taşığan ve eki totalitar rejim ve ideologiya- faşizm ve kommunizmniñ birleşme temsili olıp qalğan bir sıra añlaşmalar imzalanğan edi.

XX asırnıñ eki devleti- faşist Almaniya ve kommunistik SSSRniñ insaniyetlikke qarşı siyaseti Avropa halqlarına genotsid, insan haqlarınıñ bozuvı, arbiy ve insaniyetlikke qarşı cinayetlerni ketirdiler.

Onlarnen million insan qurbanları ve onlarnen devlet siyaseti olarnıñ bütünley yoq olunmasına doğrultılğan halqlar, bütün insaniyet tsivilizatsıyası içün felãketli neticeler- faşist Almaniya ve Kommunistik SSSR faaliyetiniñ neticeleri budır.

 

İnsaniyetlik XXI asırğa kirse bile , bir çoq memleketlerde, şu cümleden Ukrainada da cemiyette felãket kötere bilecek telükeler saqlanıldı. Böyle kibi telükelerge nevbettekilerini kirsetemiz:

— İnsan haqları ve serbestliklerine tam şekilde riayet etüvini temin etken Demokratik sistemasınıñ yoq olmasıdır.

— Ukrainanıñ bir sıra siyasiy partiyaları tarafından kommunistik ideologiyasınıñ şereflemesi ve SSSRnıñ kommunistik rejimini aqlaması.

— SSSR kommunistik rejiminiñ bütün cinayetlerini tekbih etilmesine, bu cinayetlerini amelge keçirilmesinde iştirak etken şahıslarnı mahkemege celp etmege, ırq, sınıf, etnik ve diniy üstünlik ideologiyasını kütken siyasiy küçleriniñ faaliyetlerini yasaq etmege doğrultılğan qanunlarnıñ zarurlığına diqqat etilmemesi.

— Öz vatanından sürgün etilgen ve zorbalıq ile gürbetlikte yaşatılğan qırımtatar halqınıñ haqlarını tiklev, abadanlaşuv, avdet esnaslarına qarşılq kösterilmesi.

Biz, Aqmescitte 2010 senesi 23 avgust künü keçirilgen Stalinizm ve natsizm qurbanlarınıñ umumavropa hatıra kününe bağışlanılğan Umumqırım aktsıyası- informatsıon piketniñ iştirakçileri 2009 senesi 3 iyülde Vilnüs şeerinde Avropada İşbirlik ve Havfsızlıq boyunca Teşkilãtınıñ(AİHT-OBSYE) Parlament Assambleyası tarafından qabul olunğan ‘XXI asırda AİHT regionında insan haqları ve vatandaşlıq serbestlikleriniñ teşviqatı’ rezolütsiyasına bütünley qoltutıp, ileride de totalitar akimiyetini tekbih etken cemiyetniñ şekillenmesine destek kösterecegimizni bildiremiz.

Mustaqil Ukrainada SSSRnıñ kommunistik rejiminiñ cinayetli faaliyeti aqibetleriniñ yoq etüvi ayrı şahslarğa nisbeten olamaz dep tüşünemiz. Bundan dolayı, Ukraina Prezidenti, Ukraina Yuqarı Şurası ve Ukraina Nazirler Kabinetinden Ukraina devleti tarafından insan haqları ve halqlar haqlarına riayet etüvi saasında halqara- huquq aktlarğa riayet etmesini talap etemiz. Buña munasip, biz AİHT, Avropa Şurası ve Avropa Birligine öz vatanına qaytqan qırımtatar halqına haqlarını tiklemesinde yardım köstermek ricası ie muracaat etemiz.

Bugünde bugün biz Avropanıñ bütün halqları ile birlikte stalinizm ve natsızmnıñ millionlarnen qurbanlarınıñ hatıraları ögünde başlarımıznı egemiz.

Boyun borcumız ve vazifemiz- barışıqnı saqlap, bütün halqlar ve bütün insanlarnıñ serbest ve çoqtaraflı inkişafları içün lãyıq şaraitler temin etmektir.

Stalinizm ve natsizm qurbanlarınıñ

Umumavropa hatıra kününe

bağışlanılğan Umumqırım aktsıyası

— informatsıon piketinde qabul olundı

Aqmescit, 2010 23 avgust