Qırımtatar milliy küreşi Qırımnıñ sport yaşayışına qaytıp keldi

11.05.20160:19

2010 senesi 23 yanvarda Qırım mühendislik pedagogika üniversitetinde milliy küreşiniñ Qırım federatsıyasınıñ 2008 senesi içün hülãsalar çıqarmaq ve ilerideki planlarını muzakere etmek maqsadı ile konferentsıyası keçirildi.

Konferentsıyada Federatsıyanıñ 68 azası iştirak etti- küreşçiler, sport teşkilãtçıları, beden terbiyesi ocaları, milliy öz- özüni idare etüv organlarınıñ ve Qırımnıñ çeşit regionlarından kelgen qırımtatar cemaat teşkilãtlarınıñ vekilleri. Konferentsıya milliy küreşiniñ Qırım federatsıyasınıñ reisi Rustem Kazakovnıñ kiriş sözü ve ‘Ant etkenmen’gimnnen başlandı.

Federatsıyanıñ vitse- prezidenti Cafer Bekirov teşkilãt azaları ögünde ‘Küreş’ adlı milliy küreşiniñ Qırım federatsıyası: teşkil olunması ve faaliyetiniñ ilk yılı’ serlevalı maruzası ile çıqışta bulundı.

2009 senesi 18 sport merasimleri ötkerildi, şu cümleden: 4 halqara turnir, 8 bütünqırım. Qırımnıñ çeşit regionlarında  kütleviy bayram merasimlerini keçirgende, Federatsiya azaları tarafından yerli meclisler ile birlikte Küreş boyunca kösterüv yarışları teşkil olunğan edi.

Teşkilãt tarafından keçirilgen sport merasimlerinde 1000 ziyade, şu cümleden Türkiye ve Romanya qırımtatar diasporalarını temsil etken sportsmen iştirak etti.

Qırımnıñ sport yaşayışında emiyetli vaqialardan biri- 2009 senesi 9 oktãbrde Aluştada Kuraş boyunca VII Halqara çempionatnıñ ötkerilmesidir. Mezkür çempionatta milliy küreş Qırım federatsıyasınıñ küreşçileri yüksek neticeler numayış ettiler, İlimdar Saidov ise dünya tunç çempionı unvanını qazandı.

Refat Çubarov öz çıqışında, Fedaratısya azaları, yerli ve regional meclisler azalarını, olıp keçken sport yarışlarınıñ sponsorlarına minnetdarlıq bildirip, iştirakçileriniñ diqqatını teşkilãtı,0nıñ müim vazifelerinden biri olaraq- Federatsıyanıñ yerli strukturalırını meydanğa ketirmek zarurlığına celp etti.

Federatsiyanıñ vitse-prezidenti Seydamet Yağyayev öz çıqışında federatsıyanıñ Qırımtatar diasporadaki sport teşkilãtlarınen bağları quvetleşkenini qayd etti. ‘Bu munasebetler Bütündünya Qırımtatar kongressi ketişatında başlanğan edi. O vaqıtta  dünyanıñ çeşit köşelerinde yaşağan qırımtatar sportmenler arasında işbirlik boyunca añlaşmalar tizilgen edi.’- dep qayd etti Seydamet Yağyayev.

Qırımnıñ çeşit regionlarını temsil etken Federatsıya azaları, öz çıqışlarında Federatsıya tarafından keçirilgen  sport merasimleriniñ yıllıq taqvim planını evelden tertip etilmesiniñ zarurlığına ayrı diqqat ayırdılar.  Bu da yerli ve regional meclisler ve diger meraqlanğan şahıslarğa bu merasimlerge daa da ciddiy azırlanmağa imkãn yaratacaq.

 

Sportsmen- veteranlar ve trenerler öz çıqışlarında olar tarafından teşkil olunğan Küreş boyunca sektsiyalarğa milliy mensüpligine baqmadan er bir genç kele bilecegini qayd ettiler.

QMPÜ-iniñ rektorı, professor Fevzi Yakubov, konferentsıya iştirakçilerine minnetdarlıq bildirip,  üniversitet kollektivi Qırımnıñ yañı nesilleri teren bilgiler almasınen bir sırada aydın fikir ve güzel fizik alına malik olğanına ıntılğanını bildirdi.

Konferentsiyada  Milliy Küreş Federatsıyasınıñ nizamname organları tam sıfatında şekillendi ve resmiy şahıslar saylanıldı. Da 2008 senesi dekabrde saylanılğan Federatsıya Prezidenti Rustem Kazakov, birinci vitse-prezident Cafer Bekirov ve vitse-prezident Seydamet Yağyayevge qoşulıp, Federatsıyanıñ yolbaşçılığına vitse-prezident vazifesine Aziz Abdulalayev, Mühterem Mühteremov, Ali Hamzin ve Üsein Çapuh kirsetildi.

Federatsıyanıñ kãtip vazifeleri Seydamet Yağyayevge avale olundı.

Milliy Küreş Qırım Federatsıyasınıñ fahriy Prezidenti olaraq  BQ Kongressiniñ Prezidenti Refat Çubarov saylanıldı.

Seydamet Yağyayev

Qırım Milliy Küreş Federatsıyasınıñ

vitse-prezidenti