Qırım müsülmanları diniy idaresiniñ Arizası

11.05.20160:19

2010 senesi 24-25 dekabr gecesi Jigulina Roşça (Mirnoye köyü yanında) qasabasında qurula yatqan cami binasındaki yanğın neticesinde yaqında qurulğan damı bütünley yandı ve divarlarnıñ yuqarı qısımları da zarar kördiler.

Yanğından olğan zarar 100 biñ grivnanı teşkil ete.

Yerli sakinlerniñ aytqanları ve yanğınnıñ hususiyeti köstere ki, qurula yatqan belli olmağan şahıs ya da şahıslar gruppası tarafından bina mahsus yaqıldı.

Olıp keçken vaqia Qırımnıñ müsülmanları arasında büyük rezonans doğurdı.

Qırım müsülmanlarınıñ diniy idaresi olıp keçken vaqiağa Qırımdaki dinlerara tınçlığınıñ maqsadlı bozulması olaraq qıymet kese ve uquqqoruyıcı qurumlardan bu yanğınnı yapqan şahıslarnı tapmaq ve mahkemege teslim etmekni talap ete.

Qırım müsülmanlarınıñ diniy idaresi Qırım müsülmanlarınıñ raatsızlığını añlay — Seit-Settar camisini yaqmaq ıntıluvı, Seytler ve Aqmescit rayonlarındaki meralıqlarda kibi yapılğan vandalizm aktlarnıñ baqılmasında uquqqoruyıcı qurumlarnıñ mesuliyetsizligi sebebinden provokatorlarnıñ areketleri doğru ücüm hususiyetinde olıp, insan yaşayışları içün havflıdır.

Bunınen beraber Qırım müsülmanları tüşüneler ki, provokatorlar areketleriniñ aqiqiy dinge alâqaları yoq ve olar er bir din tarafından qabul etilmecekler.

 

Qırım müsülmanalrı diniy idaresi yanğın neticesinde zarar körgen Jigulina Roşça qasabasındaki camige Qırım müsülman cemiyetleri tarafından kelgen yardımlarına qol tuta.

Qırım müsülmanları yarımadanıñ episi sakinlerini, dinine ve milletine baqmadan, tınçlıqnı saqlamağa çağıralar.

Qırım müsülmanları diniy idaresiniñ

Reisi,

Qırım müftisi Emirali Ablayev

Aqmescit ş.,

2010 senesi 27 dekabr