2010 senesi 24-26 oktâbr künleri Aqmescitniñ İslam medeniy merkezinde “Alraid” içtimaiy teşkilâtlar assotsiatsiyasınıñ teşebbüsi ile, Bütündünya islam hayriye teşkilâtınen (Kuveyt), Quran ögrenilmesi boyunca Bütündünya teşkilâtınen (Saudi Arabistan) ve Qırım müsülmanları diniy idaresinen beraber şeyh Abdullah Al Mubarak Al Subah adına Quran oquyıcılarnıñ halqara yarışı olıp keçti. 1993 senesinden yarışnıñ baş sponsorlığını hanzade Suad Al Subah yapa.
Yarışta iştirak etmek içün 10 ülkeden 40 temsilci keldi: Azerbaycan, Belorusiya, Dağıstan, Kazahstan, Qırğızıstan, Moldaviya, Rusiye, Tacikistan, Özbekistan ve Ukraina.
Yarışnıñ birinci künü iştirakçiler Qurannı eñ yahşı bilgen unvanı içün yarıştılar. Ğaliplerni dört seviyege köre belgilediler, er birinde üç mukâfatlı yer.
Yarışnıñ iştirakçileri ve musafirleri Bahçisaray devlet tarihiy-medeniy qoruqnı ziyaret ettiler.
2010 senesi 26 oktâbr künü Ukrain muzıkalı teatrnıñ zalında tantanalı sürette ğaliplerge ve iştirakçilerge qıymetli bahşışlar taqim etildi.
Yarış teşkilâtçılarnıñ sözlerine köre, cemiyetniñ müsülman adetlerinen tanış oluvı umumiy evimizde farqlı medeniyetler arasında dostlıq ve añlaşuv köpürler qurulmasına yardımcı olur.
Qırımtatar Milliy Meclisniñ reisi, Ukraina halq deputatı Mustafa Cemilev, Quran oquyıcılarnıñ halqara yarışınıñ teşkilâtçılar ve iştirakçilerine muracaat eterek, qayd etti ki, böyle büyük tedbirniñ Qırım toprağında keçirilüvi yarımada müsülmanları içün pek emiyetlidir. M.Cemilev qayd etti ki, Qırım – Avropanıñ müsülman halqlarından biriniñ milliy territoriyasıdır, bu yerde, yazıq ki, islam eki yüz yıldan ziyade sert taqip etile edi. “Bir vaqıtları, devletimiz – Qırım hanlığı yardımı ile Qırımda 1,5 biñden ziyade cami bar edi, çoq aliy oquv yurtları faaliyet köstere ediler, beş yüz yıl evelsi ise Avropanıñ eñ eski islam universitetlerinden biri açıldı – Zıncırlı medrese, — hatırlattı Qırımtatar Milliy Meclisniñ yolbaşçısı. Amma qomşu devleti territoriyamıznı zapt etken soñ, tamır halqı öz ana toprağından quvalanmağa başladı, maneviy degerlikleri yoq etile başladı”. M.Cemilevniñ sözlerine köre, müsülmanlarnıñ Qırımda quvalanması ve islam medeniyetiniñ bütünley yoq etilmesi Ekinci cian cenkiniñ soñuna Qırımdan müsülmanlar sürgün etilgen soñ olğan edi. Cemilev bunıñ bir qaç misalini ketirdi.
Öz çıqışında M.Cemilev Vatanlarına qaytqan müsülmanlar tikelnüvlerini yoq yerden başlağanlarına diqqatnı celp etti. Amma vatandaşlarnıñ küçleri yardımınen ve müsülman ülkelerdeki qardaşlarımıznıñ qol tutuvı ile soñki 20 yıl devamında Qırımda islamnıñ tiklenüvi içün çoq şey yapıldı. “84 yañı cami quruldı, 43 eski cami ğayrıdan tiklenildi, — qayd etti M.Cemilev. Amma ögümizde daa çoq iş bar. Daa yüzlernen camiler qurmaq kerekmiz, vatandaşlarımız arasında islam bilgi seviyesini yükseltmek kerekmiz, bir sıra cail sektalarnıñ faaliyetini toqtatmaq kerekmiz, olar insnlarımıznı şaşmalatıp, müsülmanlarnı böleler, başqa dinler temsilcileri közlerinde muqaddes dinimizni yaramay köstereler”.
Qırımtatar Milliy Meclis reisi Mustafa Cemilev halqqa ağır vaqtında yardım elini uzatqan qardaşlarğa minnetdarlığını bildirdi. Hususan “Alraid” teşkilâtını qayd etti, o, çoq yıllar devamında Ukrainada ve, hususan Qırımda, Qırım müsülmanları idaresi ve Qırımtatar Milliy Meclisinen birlikte Qırımda İslamnı tiklemek içün büyük iş yapmaqta. “Alraid” qırımtatarlarınıñ içtimaiy ve gumanitar meseleriniñ çezilüvinde yardımcı ola, Allah sizge biñ qat qaytarsın, toprağımızda islam tiklenüvine yapqanıñız içün”, — öz selâmlav sözüni tamamalaraq, teşkilât temsilcilerine tiledi M.Cemilev.
Yarış iştirakçileri ve musafirlerini Qırım müsülmanları müftisi haci Emirali Ablayev, QMC’de Ukraina Prezidenti temsilcisiniñ muavini İbraim Mamutov, Qırım müendislik ve pedagogika universitetiniñ rektorı Fevzi Yakubov, cumhuriyet akimiyetiniñ vekilleri de hayırladılar.
Meclisniñ Matbuat hızmeti
Şeyh Abdullah Al Mubarak Al Subah adına Quran oquyıcılarnıñ halqara yarışı. 24-26 oktâbr,2010 s., Aqmescit ş., Qırım.
1 seviye:
1-ci yer – Şripov İkbal (Tacikistan)
2-ci yer – Ravşanov Yahub (Qırğızıstan)
3-ci yer – Gazimagomedov Cabrail (Dağıstan)
2 seviye:
1-ci yer – Nuriddini Şamiddin (Tacikistan)
2-ci yer – Amire Yersin (Kazastan)
3-ci yer – Yunusov Yunus (Dağıstan)
3 seviye:
1-ci yer – Şaripzade Abumuslim (Tacikistan)
2-ci yer — Mustapayev Usman (Dağıstan)
3-ci yer — Bekişov Manas (Qırğızıstan)
4 seviye:
1-ci yer – Dervişev Rasim (Qırım)
2-ci yer – Ahtemov Ayder (Qırım)
3-ci yer – Kurtnezirov Emir (Qırım)