2010 senesi 29 oktãbrde Qırımtatar sanat müzeyinde keçirilgen qırımtatar tarihçılar Assotsıatsıyasınıñ toplaşuvı ketişatında ‘Larişes’ virtual müzeyiniñ yolbaşçısı Guliver Altin öz kollektsıyasını Qırımğa ketirmek ve mında qırımtatar tarihınıñ şahsiy müzeyini meydanğa ketirmek niyeti aqqında tarif etti.
‘Larişes’ kollektsıyası malümatnıñ tek saqlanması degil de, onı elde etilmesidir. Ve tek kopiyalarını degil de, asıl nushalarınıñ tapılmasıdır. Menimce, er bir millet tarihını asıl şekilde saqlamaq kerek’,- dep Guliver öz kollektsıyası aqqında ikãye ete. Soñki 6 yıl içersinde kollektsıyada biñden ziyade eksponat toplandı. Gravüralar, litografiyalar(XVI-XIX a.) ve il. Müzeyde zengin kitaphane toplandı- XIX asırğa ait kitaplarnıñ asıl nushaları, coğrafik haritalarnıñ kollektsıyaları.
Kollektsıyanıñ havfsızlığını temin etilmesi boyunca da büyük iş yapıla. Müzey yolbaşçısınıñ aytqanına köre, o onıñ içün maddiy degil de, daa çoq maneviy degerliktir. O tek öz -özüniñ ögünde degil de, bütün qırımtatar halqı ögünde mesuliyetlikni duya.
Müzeyni meydanğa ketirmekten ğayrı, Guliverniñ Qırımdaki 500 mektebinde ‘Larişes’ galereyasını teşkil etmek niyeti bar. Bundan da ğayrı, toplaşuvda oquv ve bediy edebiyatınıñ tolerantlıq meselesi de muzakere etildi. Gülnara Bekirova mektep dersliklerinde milletlerara ve diniy añlaşılmamazlıqlarnı kerginleştirgen faktlarnı tapıp almasına doğrultılğan leyha aqqında ikãye etti.
Zarema Server