Frantsiya senatorı Jan-Pyer Plankad Mustafa Cemilev ile körüşti

11.05.20160:19

2010 senesi 29 sentâbr künü Bahçisaray şeerinde Zıncırlı medrese tarihiy kompleksiniñ territoriyasında Qırımtatar Milliy Meclis Reisi, Ukraina halq deputatı Mustafa Cemilevniñ dostluq gruppasınıñ reisi, senator Jan-Pyer plankad yolbaşçılığında Frantsiya Cumhuriyetiniñ Senatında Frantsiya-Ukraina parlamentara dostluq gruppasınıñ temsilcileri ile körüşüvi olıp keçti. Delegatsiya terkibine “Frantsiya-Ukraina” dostluq gruppasınıñ azaları olğan Jaklin Panis ve Simon Sütur senatorları da kirdiler.

“Biz içün qırımtatar halqı ve onıñ şimdiki vaziyeti aqqında bilmek pek meraqlı ve müimdir. Qırımda planlaştırılğan körüşüvler arasında birinci olaraq siz ile körüşüvimizge qarar berdik”, — dedi delegatsiya yolbaşçısı Jan-Pyer Plankad, Meclis Reisi Mustafa Cemilevge muracaat eterek. Senator Plankadnıñ sözlerine köre, fransız delegatsiyanıñ vekilleri qırımtatar halqınıñ faciası aqqında yahşı bileler, bugünki körüşüv ise – dünyaca belli uquqqoruyıcısı ve dissidentke sualler bermek ve eşitmekniñ imkânıdır. “Öz halqınıñ Vatanğa qaytuvı içün demokratik küreşinde Mustafa Cemilev ve arqadaşlarınıñ ğayretlerine Frantsiya yüksek qıymet kese”, — qayd etti Plankad.

Sübet devamında taraflar yerli akimiyet qurumlarına saylav kampaniyası ve olarda qırımtatarlarnıñ iştiragı hususiyetlerine diqqat ayırdılar. Meclis Reisi Mustafa Cemilev qayd etti ki, yazıq ki, yañı qanunğa köre, saylavlar proportsional-majoritat sistemine köre keçirilecekler, bu sebepten de yerli akimiyet qurumlarında qırımtatarlarnıñ sayısı eksilir.

Frantsiya-ukraina dostluq gruppasınıñ yolbaşçısı Jan-Pyer Plankadnıñ fikirine köre, saylavlar aqqında qanunlarnıñ saylavlardan evel deñişmesi aqiqiy demokratiya içün şaşırtqan bir areketlerdir, bu aqqında o, 2010 senesi Kiyevde Ukrainanıñ ükümeti temsilcileri ile körüşüvinde ayttı.

 

Körüşüv devamında muzakere etilgen başqa mevzular arasında qırımtatar tiliniñ tiklenüvi ve inkişafı, hususan qırımtatar tilinde ögretken mekteplerniñ yetişmemezligi, sualleri bar edi.

Dostluq gruppasınıñ azaları qayd ettiler ki, farnsız cemiyeti, episi Avropa halqları kibi, milliy azlıqlar aqlarınıñ teminlevi içün ve milletlerniñ assimilâtsiyasına qarşı çıqışta bulunalar. “İmkânımız olğanı qadar Avropa cemiyetiniñ vekillerine qırımtatar meselesi aqqında haber bermege azırmız”, — dediler farnsız senatorları.

Öz nevbetinde, Meclisniñ tış munasebetler bölüginiñ yolbaşçısı Ali Hamzin qayd etti ki, Avropa birliginiñ azaları olğan devletler Öz vatanında qırımtatar halqınıñ aq-uquqları tiklenüvi, Ukrainada havfsızlığı teminlevi ve inkişafınıñ kefilligi sualleri boyunca halqara forum keçirilüvi ğayesine qol tutuvları ile qırımtatar halqına yardım ete bileler.

Meclis yolbaşçısı, Ukraina halq deputatı Mustafa Cemilevge muracaat eterek, Frantsiya-Ukraina dostluq gruppasınıñ yolbaşçısı qayd etti ki, Ukraina tek öz vatandaşlarınıñ, şu cümlede qırımtatarlarnıñ aq-uquqlarını teminlevi şartı ile Avropa Birligine kire bile.

Qırımtatar Milliy Meclisniñ Matbuat hızmeti