Demokratik degerlikleriniñ qaviyleşmesine yardım etmek

11.05.20160:19

2010 senesi 5 avgustta Meclis ofisinde Meclis reisiniñ birinci muavini Refat Çubarov Halqara Cumhuriyet İnstitutınıñ(HCİ) Avroasiya memleketler deportamentniñ müdiri Stiv Nike, Ukrainada HCİ programmalarınıñ koordinatorı Kris Holşzen ve Qırımda HCİ programmalarınıñ koordinatorı Konstantin Ploskiynen körüşti. Körüşüvde Meclisniñ tış bağlar bölüginiñ yolbaşçısı Ali Hamzin, Meclis Kãtipliginiñ yolbaşçısı Zair Smedlãyev de iştirak ettiler.

Halqara Cumhuriyet İnstitutınıñ(HCİ) Avroasiya memleketler deportamentniñ müdiri Stiv Nike añlatqanına köre, HCİ vekilleriniñ Qırımğa iş ziyaretiniñ ve Meclis yolbaşçılığınen körüşüviniñ esas maqsadı- İnstitut faaliyeti, onıñ programmaları aqqında bilgi berilmesi ve kelecekte işbirlik şekillerini muzakere etilmesidir.

Bundan da ğayrı, Stiv Nike Qırımda HCİ-niñ regional ofisi faaliyet köstermege başlağanını bildirdi. ‘ Bu künlerde men Ukrainada AQŞ elçisi ile körüştim. Amerika diplomatı İnstitutımıznıñ Ukrainadaki faaliyetimizniñ eñ aktulal yönelişlerinen, şu cümleden qırımtatar halqınen faal işbirligi aqqında tanış oldı.’ Nikeniñ aytqanlarına köre, Ukrainadaki AQŞ elçisi HCİ programmalarını amelge keçirüv esnasına digerlernen bir sırada qırımtatar cemaat teşkilãtları faal celp etilgenine yüksek qıymet kesti.

İnstitut vekilleriniñ ricası ile Refat Çobarov qırımtatar halqnıñ temsil organı Meclis ve milliy Qurultayınıñ tarihı, terkibini, faaliyetini açıqlap, Ukraina ve Qırımda yüz bergen siyasiy protsesslerde Meclisniñ rolü ve işltiragini de qayd etti.

‘Ukraina prezidenti V.Yanukoviç ve Meclis reisi M.Cemilevniñ 2010 senesi 13 mayısta yer alğan körüşüvleri vaqtında biz, devlet başına Prezidentniñ kelecekte qırımtatar halqnıñ vekiller Şurasınıñ faaliyetinde iştirak etüv şeklini tayin etmek ricası ile muracaat ettik. Buna cevap olaraq, Prezident Qırımda bu seneniñ avgust ayında Şuranıñ bütün terkibi ile körüşmege veda etken edi.’

 

Refat Çubarov añlatqanına köre, Meclis yolbaşçılığınıñ ğayretlerine baqmadan, evelden Prezident iştiragi ile qırımtatar vekiller Şurasınıñ toplaşuvını keçirmek añlaşması amelge keçirilmedi. Bunıñ sebeplerinden biri olaraq, soñ daqqası evelde keçirilmesi közde tutulğan tedbirniñ formatını deñiştirgen bazı memurlarnıñ qarışması seslendirildi.

İnstitutnıñ qırımtatar Meclisi ve cemaat teşkilãtları ile işbirliginen bağlı meselelerni muzakere etkende, Meclis yolbaşçılığı, HCİ hadimleriniñ ricası ile, Qırım cemaatçılığınıñ çoqmilletli terkibini közde tutqan bir sıra tekliflerini bildirdi.’ Fikrimizce, aynı zamanda çeşit millet vekilleri iştirak etip olğan programmalar ayrı emiyetke lãyıqlar. Olarnıñ yardımınen Qırımda biri-birine işanç ve añlavını qaviyleştirmege imkãn yaratılır.’- dep qayd etti Refat Çubarov.

Öz nevbetinde, HCİ vekilleri seslendirilgen ğayeni musbet qabul etip, leyhalardan biri olğan- ‘Yaş siyasetçiniñ mektebi’ treningi öz diñleyıciler dairesini kenişletir, qırımtatarlar arasından jurnalist, cemaat erbapları, tecribeli siyasetçilerini işbirlikke celp etecegini bildirdi.

Qırım regionında içtimaiy- siyasiy vaziyetini talil eterek, HCİ-nıñ hadimleri bir sıra Qırım cemaat teşkilãtlarınıñ faaliyetlerine qıymet kesmekni rica ettiler. Bu aqta meclisniñ tış bağlar bölüginiñ yolbaşçısı Ali Hamzin Qırımdaki bir sıra teşkilãtlarını, şu cümleden bazı kazak qurumlar ve olarnıñ liderleriniñ faaliyetlerini qısqadan talil etti.

Körüşüvniñ soñunda iştirakçiler daa bir kere şunu qayd ettiler ki, qırımtatar Meclis ve Halqara Cumhuriyet institutı arasında ilerideki işbirlik Qırım cemaatçılığında demokratik degerlikler ve esaslarınıñ qaviyleşmesine yardım etecek.

Qırımtatar Meclisiniñ matbuat hızmeti