2010 senesi 9 noyabrde qırımtatar Meclis reisiniñ birinci muavini, Meclisniñ saylav ştabınıñ rehberi Refat Çubarov ‘31 oktãbrdeki saylavlar ve Qırım cemiyeti: ümüt, munasebet, neticeler’ mevzusında matbuat- konferentsıyanı keçirdi.
‘Saylavlarnı mart ayından oktãbrge qaldırılması em akimiyet firqasına em de oppozitsıyanı teslim etken siyasiy küçlerge zarar ketirdi’,- bu fikirni Refat Çubarov konferentsıyanıñ başında bildirip, saylavlar keçken vaqqıttan berli saylav protsessiniñ bir çoq iştirakçileri saylavcılarnıñ közlerinden çıqqanını qayd etti.
Çubarovnıñ fikrine köre, saylavcılar, yaşayışlarında müsbet deñişmeler duymağanları içün olarnıñ akimiyet firqasına işançları yoq oldı. Oppozitsıya ise cemiyet inkişafı içün bir de bir yollarnı teklif etmegeni, atta tırışmağanı içün halqnıñ işançından mahrum qaldı.
Hulãsa çıqarır eken, Refat Çubarov saylavcılarnıñ ümütleri qırılğanı içün, olar saylavlarğa da aynı munasebet kösterdiler, dep qayd etti. ‘Qırım saylavcılarınıñ tek 47% faizi saylavlarda iştirak etti. Böyle qatnaşuv, saylavlarnıñ neticelerine baqmadan,-qırım siyasetçilerini ayrette qaldırmaq kerek edi.’- dedi Refat Çubarov.
Refat Çubarovnıñ eminliknen aytqanına köre, Qırım ve zaten bütün Ukraina saylavcıları cemiyet akimiyetke tesir etmekniñ daa effektiv yollarını qıdırğanı aqqında bildirdi. Böyle adımlarından biri, saylavlarda iştirak etmemektir.
Meclis reisiniñ birinci muavini saylavlarnıñ neticeleri bütün siyasetçilerini akimiyet ve cemiyet arasında muvazenet(balans)munasebetlerini qurdırmalılar degen fikirde. Aynı zamanda da, o, akimiyet firqası muhtariyette içtimaiy-siyasiy esnaslarnı total nezaret yardımı ile qırım cemiyetinen monopol şeklinde idare etmege isteceginiñ de ihtimalı bar dep tüşüne.
‘ Böyle siyastçilerge şunı hatırlatmaq ister edik ki, ileri ketken firqa diger siyasiy küçler ve cemiyet ile muvazenet munasebetler qurmağa tırışmasa akimiyet sabit olmaz.’ -dep hatırlattı Refat Çubarov.
Qırımtatar saylavcılarına kelgende ise, Refat Çubarovnıñ qayd etkenine köre, saylavlarda iştirak etken qırımtatarlarnı saylav neticeleri tam derecede qanaatlendirmey.
‘ Bugün bizler bizge berilgen derslerni menimsemek kerekmiz. Keçken saylavlardan doğru hulãsalar çıqarıp, qırımtatar cemaatçılına Meclisniñ faaliyetini mukemelleştirmege yardım etken mehanizmlerni tapıp teklif etecegimizge ümüt etem,’-añlattı Refat Çubarov.
Aynı zamanda da, R.Çubarovnıñ aytqanına binaen, Meclis yolbaşçılığı memnüniyet ile şunı qayd ete ki, belli bir siyasiy küçlerniñ qırımtatar cemaatçılığını mümkün olğanı qadar derecede bölmek maqsatları amelge keçirilmedi. ‘ Biz bu vazifeni becermek içün nasıl usullar işletilgeni, nasıl küçler celp etilgenini bilemiz. Bugün ise olarnıñ tarafından bildirilgen bir sıra izaatlar, şu cümleden Vasfi Abduraimovnıñ saylavlarda Milliy Firqa 100 biñ rey qazanacaqları aqqında bildirüvni külip hatırlamaq mümkün,’-dedi Refat Çubarov.
QMC Yuqarı Şurasınıñ Qurultay-Ruh deputatlarıñ diger siyasiy küçlerinen işbirlikniñ ihtimalı aqqında sualge cevap berir eken, Refat Çubarov, deputatlar insanlarnıñ er künlük problemlerini çezmege tırışqan siyasiy firqalar ile öz ğayretlerini birleştirecekleri ve aksine, Qırım sakinlerine ve ayrıca da qırımtatarlarğa, fayda ketirmeycek, zararlı ola bilecek areketlerge qarşı çıqacaqlarını bildirdi.
Meclis reisiniñ birinci muavini jurnalistlerni saylavlarnıñ ilk neticelerinen tanış etti. Neticelerge binaen, rayon ve şeer şuralarğa 110 ziyade deputat saylanıldı, olardan 21 adam köy şuralarnıñ yolbaşçıları vazifelerine saylanıldı. ‘Bizim deputat korpusımız bütün Qırım boyunca bütün yerli şuralarnen beraber 1 biñni teşkil eter dep tüşünem’,- dedi Refat Çubarov ve 2006 senesi saylavlarğa köre bu sene neticeler daa güzel olğanını qayd etti.
Qırımtatar Meclisniñ matbuat hızmeti