2010 senesi iyun 17 künü Qırımtatar Milliy Meclis Reisiniñ birinci muavini Refat Çubarov Meclis ofisinde Nyu-York şeerinden kelgen İnkişaf programması (BMTİP) faaliyetiniñ effektivligine qıymet kesüvi boyunca mutehassıslar tehnik delegatsiyasını qabul etti.
Halqara ekspertler delegatsiyası terkibine BMTİP yanındaki Tiklenüv ve kriziske qarşı küreş boyunca büronıñ mutehassısı Serdar Bayriyev, tiklenüv ve kriziske qarşı küreş boyunca BMTİP yanındaki mutehassıs Anita Ernstorfer, BMT siyasiy işler departamentiniñ mutehassısı Filipp Boden-Oyyak kirdiler. Musafirlernen birlikte BMTİP uyken idarecisi, “Demokratik idare” klasterniñ yolbaşçısı Mihail Minakov ve uyken analitik, BMTİP araştırmalar ve monitoring bölüginiñ yolbaşçısı Kurtmolla Abdulganiyev keldiler.
Tehnik delegatsiyanıñ ziyaretiniñ maqsadı, Serdar Bayriyevniñ sözlerine köre, Qırımda BMTİP ilerideki faaliyetiniñ planlaştırılması içün malümat toplamaq, Qırımda BMTİP programmalarnıñ ömürge keçirilüviniñ ketişatı aqqında fikirlernen paylaşmaq.
Refat Çubarov, BMTİP hadimleirne muracaat eterek, Qırımnıñ inkişafına ve umumiy maqsadlarğa irişmek içün, yarımada sakinleriniñ öz-özlerini teşkil etilüv seviyesiniñ köterilmesine yonelgen leyhalarnıñ ömurge keçirilüvinde BMT’nıñ faaliyetine yüksek qıymet kesti.
“Qırım ve sakinleri içün, şu cümlede, ebet, qırımtatar halqı da, Qırımda halqara teşkilâtlarnıñ faaliyeti cemiyette konflikt seviyesiniñ eksiltilmesine yardımcı olğan müsbet bir faktordır. BMTİP Qırımnıñ inkişaf ve integratsiyası programması – 90-cı seneleri ortasından Qırımda ömürge keçirilgen birinci halqara programmalarından biri olıp, Qırım cemaatınıñ içitmaiy meseleleri çezilüvine büyük isse qoştı, şu cümlede toplu yaşağan yerlerinde qırımtatarlarnıñ meseleleri”, — qayd etti Refat Çubarov.
Subet devamında taraflar qırımtatar tiliniñ vaziyeti, qırımtatar tilinde mektepten evel ve mektep tasiliniñ tiklenüvi ve inkişafı, qayta yatqan qırımtatar halqınıñ aq-uquqlarını teminlegen qanunlar qabul etilmesiniñ zarurlığına dair aktual meselelerni muzakere ettiler. BMTİP delegatsiya temsilcileri qayd ettiler ki, Meclisniñ raatsızlığını añlaylar ve bu meseleler çezilüviniñ yollarını birlikte tapmaq zarurlığına qol tutalar.
Körüşüvniñ soñunda Refat Çubarov, BMTİP hadimlerini ileride de Meclisniñ BMTİP ile işbirlik tutmaq azır olğanında işandırıp, qayd etti: “Şimdiki vaqıtta biz halqara ve Avropa teşkilâtlarınıñ qol tutuvı ile mahsus Öz vatanında qırımtatar halqınıñ aq-uquqları tiklenilmesi, Ukrainada havfsızlığınıñ teminlevi ve inkişafınıñ kefilligi boyunca halqara forum keçirilmesiniñ kontseptsiyasını azırlaymız. Ebet, Halqara forumda BMTİP’nıñ qol tutuvı ve iştiragına ümüt etemiz, böyle etip episi meraqlanğan taraflar genotsid olaraq belgilengen XX asırnıñ eñ qorqunç cinayetlerinden biri – qırımtatar halqı sürgünligi aqibetleriniñ yoq etilmesi boyunca tedbirlerni muzakere etip, qabul etme bileler”.
Qırımtatar Milliy Meclisniñ
Matbuat hızmeti