OBSY milliy azlıqlar boyunca Baş Komissarnıñ ofisi temsilcilerinen Meclisteki körüşüv

11.05.20160:19

2010 senesi iyun 3 künü Qırımtatar Milliy Mecliste Reisniñ birinci muavini Refat Çubarov OBSY milliy azlıqlar boyunca Baş Komissarınıñ (MABK) üyken mesleatçısı Klemens Büşer ve MABK ofisiniñ uquqiy sualler boyunca mesleatçısı Vinsent de Graf ile körüşüvi olıp keçti.

Körüşüvde Meclisniñ tış alâqalr bölüginiñ yolbaşçısı Ali Hamzin ve Meclis Kâtipliginiñ yolbaşçısı Zair Smedlâyev de iştirak ettiler.

Musafirlerni selâmlaraq, Refat Çubarov OBSY milliy azlıqlar boyunca Baş Komissarı Knut Vollebekke, ve MABK ofisi hadimlerine qırımtatar meselesine diqqat etkenleri ve olarnı çezmege tırışqanları içün minnetdarlığını bildirdi. “Ebet, halqımız içün öz meselelerinen tek özü oğraşamağanıñ añlaması pek müimdir. Ukraina siyasetçileri içün Qırımtatar Milliy Meclis Reisi Mustafa Cemilevniñ OBSY milliy azlıqlar boyunca Baş Komissarı Knut Vollebekile 2010 senesi mart 19 künü Gaagada olıp keçken körüşüvi diqqatsız qalmadı”, — qayd etti Refat Çubarov.

OBSY Baş Komissarınıñ üyken mesleatçısı Klemens Büşer, Ukraina devlet organları ve Qırımtatar Milliy Meclis ile MABK ofisiniñ ilerideki işbirlik planları aqqında haber berip, qayd etti: “OBSY milliy azlıqlar boyunca Baş Komissarı Knut Vollebekk ve ofisiniñ hadimleri ileride de qırımtatarlarınıñ aq-uquqları tiklenüvi boyunca qanun leyhasınıñ azırlanmasında yardım etmege azırlar”.

MABK ofisi temsilcileriniñ ricası ile, Refat Çubarov, Zair Smedlâyev ve Ali Hamzin soñki ayları Qırımnıñ içtimaiy-siyasiy yaşayışındaki esas tendentsiyalarnıñ hususiyetlerini kösterdiler. Bunınen beraber musafirlerniñ diqqatını 1944 senesi 18 mayıs künü qırımtatar halqınıñ genotsidi qurbanları hatırasına bağışlanğan 2010 senesi mayıs 18 künü ötkerilgen Bütünqırım matem mitinginde qabul olunğan Rezolütsiyadaki talap ve teşebbüsler celp ettiler. Bu munasebet ile Qırımtatar Milliy Meclis temsilcileri Qırımtatar halqınıñ öz Vatanında aq-uquqları tiklenüvi, Ukrainada onıñ havfsızlığınıñ teminlevi ve inkişafınıñ kefilligi meselesi boyunca halqara forumnıñ keçirilüvi zarurlığı aqqında söz yürsettiler. “Bu Forumnıñ işi teşkil etilmesinde halqara ve Avropa teşkilâtlarnıñ iştiragine ümüt etemiz. Şimdiki vaqıtta Qırımtatar Milliy Meclisi Bütündünya qırımtatar kongressiniñ Koordinatsion keñeşinen birlikte onıñ keçirilüvi kontseptsiyasınıñ azırlanmasına başladı”, — dedi Ali Hamzin.

Zair Smedlâyev MABK ofisi temsilcileirniñ diqqatını icra akimiyeti organlarında qırımtatarlar temsilcileriniñ sayısı azlaşqanına celp etti. “Böyle vaziyetniñ sebepleri insanlarnıñ vazifelerge partiya ve şahsiy sadıqlıq printsiplerine köre tayin etilüvleridir”, — añlattı Zair Smedlâyev.

Körüşüv tamamlanğanınen iştirakçileri 2010 senesi iyun 3-4 künleri Aqmescitte keçirilgen “Çoqetnik cemiyetlerde tanuv siyaseti ve cemaatçılıq ve devletniñ işbirligi” konferentsiyada iştirak ettiler.

Qırımtatar Milliy Meclisniñ

Matbuat hızmeti