Qırımnı İslam İnkişaf Bankınıñ temsilcileri ziyaret ettiler

11.05.20160:19

2010 senesiniñ 10 aprel künü Qırımtatar Miliy Meclisniñ reisi Mustafa Cemilev İslam İnkişaf Bankınıñ reisi, doktor Avad Salem Al-Usamiye ve İİB İdarsiniñ azası, doktor Mohammad Ahmad Salem ile körüşti.

İslam İnkişaf Bankınıñ temsilcileri Sudaq, Eski Qırım, Zuya, İçki, Kamaci, Bahçisaray, Bürülük, Yaşlav, Kezlevdeki qırımtatar milliy mekteplerini ziyaret ettiler, bu mekteplerde İslam bankınıñ “Qırımtatar tilinde oqutqan mektepleriniñ maddiy-tehnik bazasınıñ pekitilmesi boyunca gumanitar yardım” leyhası ömürge keçirildi.

Leyhağa İslam bankı 2008 senesi Qırımtatar Milliy Meclisniñ yollağan tevsiyelerine köre qol tuttı.

Ziyaretleri ketişatında, 2008 senesi fevral ayında, İİB temsilcileri mekteplerniñ ocaları ve talebelerinen tanış olıp, bulunğan mekteplerinde talebelerniñ oquv şaraitleri ağır olğanından raatsızlıqlarını bildirdiler. Meclis İİB’qa qırımtatar mekteplerinde mevcüt olğan meseleler cedvelini köstergen vesiqalarnı berdi. İslam bankı öz muşaverelerinden birinde doquz milliy mektepniñ binalarınıñ tamiri boyunca leyhağa para bermek qararına keldi. İİB leyhasınıñ yapıcısı olraq VAOO “Alraid” tayin etildi, o, Meclisniñ tasil boyunca İdarsinen ve “Maarifçi” Qırımtatar tasil hadimleri assotsiatsiyasınen işbirlikte qısqa müddet içinde bu leyhanı ömürge keçirdi. İİB’nıñ para yardımı ile qırımtatar tilinde ögretken bu mekteplerinde yarım yıl içinde büyük tamir işleri yapıldı: binalarnıñ, sınflarnıñ  ve fen odalarnıñ tamiri. Qurucılıq işleri yapıldı, eki mektepniñ qoraları yapıldı, oqutuv kabinetleri, aşayt blokları, oqutuv ustahaneleri, tıp kabinetleri içün tehnika alındı, fizika, himiya ve biologiya boyunca elektron kitaphane elde etildi.

Meclis reisi Mustafa Cemilev İslam İnkişaf Bankınıñ reis muavini, doktor Avad Salem Al-Usamiye ve İİB İdarsiniñ azası, doktor Mohammad Ahmad Salemge qırımtatar milliy mekteplerine yapqan yardımları içün minnetdarlığını bildirdi. “Diqqatıñız ve yardımıñızğa büyük qıymet kesemiz, hususan er devlet içün ağır olğan böyle vaqıtlarda”, — qayd etti M.Cemilev. Em de İİB temsilcilerniñ diqqatını milly tasilniñ inkişafı ve saqlanılması qırımtatar halqı içün eñ aktual meselelerinden biri olğanına celp etti. M.Cemilevniñ sözlerine köre, milliy tasil sistemasınıñ esasında şekillengen qırımtatarlarnıñ milliy özgünliginiñ saqlanılması Qırımtatar Milliy meclisniñ esas vazifelerinden biridir.

Körüşüvniñ soñunda İib temsilcileri nevbetteki kere İslam İnkişaf Bankınıñileride de Qırımtatar Milliy Meclisi, Qırım müsülmanlarınıñ diniy idaresi tarafından tevsiye etilgen tasil, saqlıq qoruvı ve ruhiy inkişaf saalarındaki leyhalarnı baqmağa ve qol tutmağa azırlığını bildirdiler.

 

Meclisniñ Matbuat hızmeti