Mustafa Cemilevniñ Ukrainadaki Avropa Komissiyasınıñ Temsilcilik Yolbaşçısı Joze Manuel Pintu Teyşer ile körüşüvi

11.05.20160:19

2010 senesiniñ 13 aprel künü Kiyevde Qırımtatar Milliy Meclis reisi Mustafa Cemilevniñ Ukrainadaki  Avropa Komissiyasınıñ Temsilcilik Yolbaşçısı Joze Manuel Pintu Teyşer ile körüşüvi olıp keçti, körüşüv devamında Mustafa Cemilevniñ Brüsselge iş ziyaretiniñ neticeleri muzakere etildi. Ziyareti ketişatında M.Cemilev Avropa Parlamentinde çıqışta bulundı ve Avropa Parlamentiniñ deputatları ile ayrı körüşüvleri oldı.

Ondan da ğayrı, Mustafa Cemilev Avropa Komissiyasınıñ Temsilcilik Yolbaşçısını özüniñ milliy azlıqlar boyunca OBSY Baş komissarı Knut Vollebek ile 2010 senesiniñ mart ayında Gaaga şeerinde olıp keçken körüşüvi aqqında haberdar etti.

Mustafa Cemilev ve Joze Manuel Pintu Teyşer Avropa Birliginiñ azaları olğan ülkeler tarafından Qırımda yapılması közde tutulğan içtimaiy-iqtisadiy ve gumanitar leyhalar aqqında fikirlerinen tafsilâtlı paylaştılar.

İlk sırada közde tutulğan meseleler aqqında laf yürseterek, Mustafa Cemilev qırımtatar tilinde tasil sisteması tiklenilmesine yardım kerekligini qayd etti, ve Qırım müendislik-pedagogika universitetiniñ rektorı prof. Fevzi Yakubovnıñ QMPU inkişafı boyunca tevsiyelerni berdi.

Daa Qırımda etnik turizmniñ inkişafı boyunca meselelr muzakere etildiler, böyle turizm yardımınen Qırımnıñ musafirleriniñ tek raatlanmaq degil, tamır halqı ve Qırımda yaşağan başqa etnoslarnıñ medeniyeti ile tanış olmağa imkânları olur edi.

 

Elçi Qırımtatar Milliy meclis reisi Mustafa Cemilevge Qırımda ömürge keçirilgen leyhalar meraqlanğan er bir tarafnen, şu cümlede Qırımtatar Milliy Meclisnen de, tafsilâtlı muzakere etilmege kerek olğanını ayttı.

Mustafa Cemilev Ukrainada Avropa Komissiyasınıñ Temsilcilik Yolbaşçısı Joze Manuel Pintu Teyşerni 2010 senesiniñ mayıs ayında Qırımnı ziyaret etmege davet etti.

 

Matbuat hızmeti