2010 senesiniñ 14 aprel künü Kiyevde Qırımtatar Milliy Meclis resi Mustafa Cemilev Smolensk yanında Poloniya Cumhuriyetiniñ Prezidenti Leh Kaçinskiy yolbaşçılığındaki resmiy delegatsiyasınıñ uçaq qazasında facialı ölümi munasebeti ile Poloniya Cumhuriyetiniñ elçiligini ziyaret etti. Qırımtatar Milliy Meclisi adından Poloniya elçiligi yanına gül qoyuldı.
Meclis reisi Poloniya Cumhuriyetiniñ Fevqulâde ve Murahhas elçisi Yatsek Klüçkovskiynen körüşip, Poloniya halqınıñ başına kelgen büyük facia munasebeti ile qırımtatar halqı adından taziye bildirdi.
Poloniya elçisi ile sübette M.Cemilev qayd etti ki, qırımtatarlarnıñ hatırasında Leh Kaçinskiy ve Poloniyanıñ demokratik küçlerini temsil etken, belli “Solidarnost” siyasiy areketniñ vaqıtında kommunistik rejimi ile küreşken yaqın insanları daima qalacaqlar.
Qırımttara Milliy Meclisi adından M.Cemilev “2010 senesiniñ 10 aprel künü Smolensk yanında uçaq qazasında elâk olğanlarnıñ hatıra kitabı”nda yazı qaldırdı.
Meclisniñ matbuat hızmeti