OBSY Baş Komissarınıñ milliy azlıqlar işleri boyunca mesleatçıları Milliy Meclisni ziyaret ettiler

11.05.20160:19

2011 senesi 1 mart künü Qırımtatar Milliy Meclis Reisiniñ birinci muavini, Bütündünya qırımtatar kongressiniñ prezidenti Refat Çubarov Qırımtatar Milliy Meclisniñ ofisinde OBSY Baş Komissarınıñ milliy azlıqlar işleri boyunca uyken mesleatçısı Klemens Büşer ve uquqiy sualler boyunca mesleatçı Vinsent de Grafnı qabul etti.

Meclis Prezidiumnıñ azaları Ali Hamzin, Zair Smedlâyev ve Bekir Mamutov iştirak etken körüşüvde Meclisniñ bir sıra sualerge dair fikirleri seslendirildi. Hususan, OBSY temsilcileriniñ diqqatını çezilüvi başlanğan topraq meselesine ve qırımtatarlarnen bağlı suallerde Qırım akimiyeti ile başlanğan dialogğa celp etildi.

Misallerden biri, Çubarovnıñ sözlerine köre, Aqmescitte Cuma Cami qurucılığı etrafındaki mesele çezilüviniñ başlanması. Musafirlerge bildirildi ki, 15 fevral künü Aqmescit şeer şurası Qırım müsülmanları diniy idaresine Cuma Cami qurucılığı içün Yaltinskaya 22 adresi boyunca 2,7 ga topraqnı berdi. R.Çubarovnıñ fikrine köre, çoqtan berli sozulğan bu mesele QMC NŞ Reisi Vasiliy Cartı yardımınen yerinden köçti. R.Çubarov haber etti ki, 2011 senesi 2 mart künü Aqmescit şeer şurasınıñ nevbetteki sessiyası keçirilecek, anda deputatlar bu topraqnıñ QMDİ’ne daimiy qullanuvğa berilmesi aqqında sualni baqacaqlar ve musbet qarar çıqaracaqlar.

“2011 senesi 3 mart künü, — devam etti Çubarov, — Aqmescitte Yaltinskaya 22 adresi boyunca Cuma Cami qurucılığı yerinde hatıra taşı qoyulmasına bağışlanğan tantanalı tedbir keçirilecek. Tedbirde Milli Meclisniñ Reisi Mustafa Cemilev, Qırım Muhtar Cumhuriyeti Nazirler Şurasınıñ Reisi Vasiliy Cartı, Qırım Muhtar Cumhuriyetinde Prezidentniñ Daimiy temsilcisi Vladimir Yatsuba, Qırım müsülmanları müftisi haci Emirali Ablayev, Bütündünya qırımtatar kongressiniñ Prezidenti Refat Çubarov iştrak etecekler”.

 

Klemens Büşer ve Vinsent de Graf OBSY Baş Komissarı adından qırımtara halqına ve umumen Qırım ealisine Aqmescitte Cuma Cami qurucılığı meselesiniñ çezilüvinde ileride de muvafaqiyetler tilediler.

Ondan da ğayrı, muzakere etilgen suallerden biri millet mensüpligine köre sürgün etilgen vatandaşlarnıñ aqları boyunca Ukraina qanuncılığı oldı. Nevbetteki kere Ukraina halq deputatı M.Cemilev tarafından Ukraina Yuqarı Şurasına yollanılğan Ukrainanıñ “Millet mensüpligine köre sürgün etilgen şahıslarnıñ aqları tiklenmesi aqqında” qanun leyhası etrafında vaziyet seslendirildi.

OBSY temsilcilerniñ ricası ile, Bütündünya qırımtatar kongressiniñ Prezidenti musafirlerni Qırımtatar halqınıñ öz Vatanında aq-uquqlarınıñ tiklenüvi, Ukrainada inkşafınıñ kefaleti ve havfsızlığınıñ teminlevi sualleri boyunca halqara forumğa azırlanuv esnasınen tanış etti. Bunınen beraber, musafirlerge muracaat eterek, R.Çubarov nevbetteki kere qayd etti ki, OBSY kibi teşkilâtlarnıñ şahsında halqara cemaatçılığı ne qadar çoq Ukraina ve Qırımnen meraqlansa, Ukraina ve qırımtara cemaatçılığına dair o qadar musbet siyaset alıp barılacaq.

Meclisniñ Matbuat hızmeti