2011 senesi 14 aprel künü Qırımtatar Milliy Meclisniñ Reisi, Ukraina halq deputatı Mustafa Cemilev Meclis ofisinde Kırıkkale şeeriniñ (Türkiye Cumhuriyeti) Ticaret odasınıñ vekillerini qabul etti. Delegatsiyanıñ yolbaşçısı — Odanıñ Reisi Harun Sümer.
Türkiye delegatsiyasınıñ ziyareti Recep İçin şahsında halqara investitsion kompaniyanıñ (“ICG Investments”) qol tutvı ile teşkil etildi.
Meclis yolbaşçısı M.Cemilevniñ Kırıkkale şeeriniñ Ticaret odasınıñ yolbaşçısı Harun Sümer ile sübetinde Ukraina regionları, hususan Qırımnıñ içtimaiy-iqtisadiy inkişafınıñ sualleri boyunca fikir paylaşuvı olıp keçti. Meclis yolbaşçısı Qırımda türk investitsion siyaseti inkişafınıñ zarurlığını qayd etti, şu cümlede qırımtatar iş adamlarınıñ iştirak etken leyhalarda.
Sübetdeşler Ukraina, Qırım ve Türkiyeniñ içtimaiy-siyasiy ayatındaki vaqialarnı muzakere etip, Türkiyede olacaq parlament saylavlarını toqundılar, olardan soñ, belli olğanı kibi, 2012 senesi baarde Türkiyede prezident saylavları beklenile.
Meclisniñ Matbuat hızmeti