Ukrainada Çehiya Cumhuriyetiniñ elçisi Mustafa Cemilevnen körüşti.

11.05.20160:19

2011 senesi 21 fevral künü Meclis ofisinde Qırımtatar Meclis reisi Mustafa Cemilev Ukrainada Çehiya Cumhuriyetininiñ elçilik işlerinde Vaqtınca vekãletli Vitezslav Pivonkanen körüşti.

Körüşüvde Meclis reisiniñ birinci muavini Refat Çubarov, Meclisniñ tış bağlar bölüginiñ yolbaşçısı Ali Hamzin ve Ukrainada Çehiya Cumhuriyeti Elçiliginiñ siyaset boyunca mesleatçısı Lüboş Veselı da iştirak ettiler.

 

Vitezslav Pivonka Çehiya Cumhuriyetiniñ çetel işler naziri, birinci vitse- baş- nazir Karel Şvantserberg adından Mustafa Cemilevge onıñ namzeti Nobel dünya mukãfatına kösterilgeni munasebetinen hayırlav ve selamlarını bildirdi.

Sübet devamında Çehiya diplomatı repatriatlarnı evlerni qurmaq içün topraqnen temin etilüvinde qırım akimiyeti ve qırımtatar Meclisi tarafından kösterilgen ğayretlerniñ emiyetini qayd etti. Vitezslav Pivonka daa şunı da qayd etti ki, Yaltinskaya, 22 adresi boyunca Cuma Camini qurmaq içün topraq ayıruv meselesi çezilmege başlağanı qırım cemaatçılığında tolerantlıq ve biri-birini ürmet etüv printsipleriniñ pekinmesine yardım eter. Sübetdeşler qırımtatar halqınıñ vaziyeti, aktual problemleri, olarnı çezüv yolları, qırımtatar halqınıñ öz vatanında haqlarınıñ tiklenmesi ve Ukrainada inkişaf kefaletleri ve havfsızlığını temin etilmesi boyunca Halqara Forumnıñ azırlanılması ve keçirilmesi aqqında öz fikirlerinen paylaştılar.