Halqara işdeşlik

11.05.20160:19

2011 senesi 7 aprel künü Milliy Meclisniñ tış bağlar bölüginiñ yolbaşçısı Ali Hamzin Leh Valensa İnstitutınıñ daveti ile Poloniyanı ziyaret etti ve Varşavada İnstitutnıñ direktorı Petr Gulçinskiynen körüşti. Körüşüvde Leh Valensa İnstitutınıñ leyhalar koordinatorı Bartoş Kozakeviç, Poloniyada qırımtatar diasporasınıñ temsili, Gdansk üniveristetiniñ aspirantı Nedim Useinov iştirak ettiler.

Körüşüvniñ başında Pötr Gulçinskiy Ali Hamzinge Poloniya prezidentiniñ Mustafa Cemilevge yollanılğan mektüpni resmiy teslim etti.

Soñra qırımtatar halqınıñ , zemane Ukrainanıñ vaziyeti ve Leh Valensanıñ İnstitutı ve Qırımtatar Meclisi ile elverişli işbirliknen bağlı bir sıra meseleler muzakere etildi. Ali Hamzin ayrıca Qırımtatar Qurultayınıñ Halqara forumnıñ keçirilmesi aqqında avalesiniñ amelge keçirilüvi aqqında Leh Valensa İnsititutınıñ rehberini ayrıca haberdar etti. Sübetdeşler Poloniya ve qırımtatar halqları arasında pekilgen tarihiy ve adetiy dostluq munasebetlerine yüksek qıymet keskenini bildirdiler.

Körüşüv soñunda ‘Leh Valensa İnsititutı’ fondu ve Qırımtatar Meclisi arasında işbirlik deklaratsıyası imzalandı. Mezkür deklarastıya 2011 senesi 30 iyünge qadar Milliy Meclis ve ‘Leh Valensa İnstititutı’ arasında işbirlik Añlaşmasını azırlamaq kerek olğan İş gruppasınıñ meydanğa ketirilmesini közde tuta. Ayrı maddede ise Qırımtatar Meclisi Leh Valensa İnstitutınıñ 2011 s. Poloniyada insan haqları boyunca halqara konferentsıyasınıñ keçirilmesine qoltutqanları qayd etile.

Pötr Gulçinskiyni içtimaiy araştırmalar İnstitutınıñ müdiri Vladislav Gribovskiy, İvan Sirko adına Hayriye fondunıñ idare reisi Vladislav Ladıgin, Meclisiniñ tış bağlar bölüginiñ yolbaşçısı Ali Hamzin tarafından azırlanğan poloniya, ukrain, qırımtatar cemaat teşkilãtlarına muracaat ile tanış ettiler. Muracaatnıñ muellifleri qomşu devletler arasında dostluq munasebetlerini qaviyleştirmek içün Varşava, Kiyev, Bağçasarayda bir sıra tögerek masalar keçirmege teklif ile bulunalar.

Bundan da ğayrı, İçtimaiy araştırmalar İnstitutınıñ teşebbüsi ile 2011 senesi 20 mayısta Dnepropetrovskte Sarısuv uruşlarınıñ 363 yıllığı munasebeti ile ukrain, qırımtatar ve poloniya halqlar tarihınıñ meselelerine bağışlanğan tögerek masa teşkil etilecegi aqqında haber etildi. Mezkür tedbirde iştirak etmek içün Leh Valensa İnstitutınıñ vekilleri davet etildi.

Körüşüvniñ soñunda Ali Hamzin Pötr Gulçinskiyni 18 mayıs qırımtatar halqınıñ milliy matem künü munasebetinen keçirilecek tedbirlerde iştirak etmege davet etti.

Leh Valensa İnstitutınıñ kitaphanesine qırımtatar milliy areketi ile bağlı kitaplar teslim etildi: ‘Mustafa Cemilevniñ 6-nci protsessi’, ‘Avdet’, ‘Yañı dünya’, ‘Qırım’ gazetalarınıñ ve ‘Qasevet’ dergisiniñ sanları.

__________________________________________________________

‘Leh Valensa İnsitutı’ fondu ve qırımtatar Meclis arasında işbirlik Deklaratsıyası

-qırımtatar ve poloniya halqı arasında tarih devamında şekillengen yaqın bağlar, dostluq ve destek munasebetlerine tayanaraq,

-ileride de içtimaiy ve gumanitar inkişafınıñ çeşit saalarında işbirlikniñ kenişlemesi qırımtatar ve poloniya halqınıñ ğayretlerine cevap bere ve işdeşlik, iyiqomşucılıq esaslarına uyğun kele dep sayıp,

 

-2011 senesi 26 noyabr künü Gdansk şeerinde Meclis reisi Mustafa Cemilev ve Poloniya Cumhuriyetiniñ Prezidenti, Nobel mukãfatınıñ laureatı Leh Valensanen körüşüvi neticesinde qurulğan munasebetlerini sistemli ve mahsuldar işbirlik ile toldurmağa ğayret etip,

-insanlar ve halqlar haqlarını temin etüv, polietnik devletlerinde milliy medeniyet, til ve dinlerniñ saqlanılması ve inkişaf etilmesi, grajdan cemaatınıñ strukturalarını qaviyleştirilmesi, totalitar rejiminiñ eziyetini çekken memleketlerde demokratizatsıya protsesslerine qoltutuv saalarında ğayretlerimizni birleştirmek maqsadı ile

Sübetdeşler nevbetteki qararlar boyunca añlaştılar:

Madde 1

Qırımtatar Meclisi ve Leh Valensa İnsititutı arasında işbirlik aqqında Añlaşmanıñ azırlanması boyunca İş gruppasını –er bir taraftan 4-er adam terkibinde teşkil etmek. Qırımtatar meclis tarafından İş gruppasına Refat Çubarov, Bekir Mamutov, Ali Hamzin, Nadim Useinov teklif etile.

‘Leh Valensa İnsititutı’ fondundan ise Pötr Gulçinskiy, Agneşka Grontkeviç, Bartoş Kozakeviç, Veronika Doboşinska teklif etildi.

Madde 2

İş gruppasına ‘Leh Valensa İnsitutı’ fondu ve qırımtatar Meclisi arasında işbirlik añlaşması leyhasınıñ azırlanması boyunca işlerini 2011 senesi 30 iyünge qadar yekünlemekni avale etmek.

‘Leh Valensa İnsitutı’ fondu ve qırımtatar Meclis arasında işbirlik añlaşmasınıñ imzalama tarihı, vaqtı, yeri ileride belgilenecek.

Madde 3

Qırımtatar Meclisi Leh Valensa İnsititutınıñ 2011 senesi Poloniyada insan ve halqlar haqları boyunca halqara konferentsiyanı keçirmek teşebbüsine qoltuta ve bu leyhanıñ teşkil etilmesinde iştirak etmege azır olğanını bildire.

Qırımtatar Meclisi ve ‘Leh Valensa İnstitutı’ fondu, mezkür Deklaratsıyanı imzalar eken, olarnıñ beraberlikte yapılacaq işleri Ukraina ve Poloniya Cumhuriyetiniñ qanunlarına bütünley uyğun olacağına esaslana.

Qırımtatar Meclisi adından Ali Hamzin

‘Leh Valensa İnstitutı’ fondu adından Pötr Gulçinskiy

2011 senesi 7 aprel, Varşava, (Poloniya)