Vitaliy Kliçko işbirlik istiqballeri aqqında

11.05.20160:19

2011 senesi sentâbrniñ 16-sında Yaltada Qırımtatar Milliy Meclisniñ Reisi Mustafa Cemilev ve birinci muavini Refat Çubarov “Udar” siyasiy firqasınıñ lideri Vitaliy Kliçko ile körüştiler. Körüşüvde “Udar” firqası yolbaşçısınıñ muzvini Vitaliy Kovalçuk, Meclisniñ tış munasebetler bölüginiñ yolbaşçısı Ali Hamzin, Meclis azası Zaur Smirnov, Yalta regional meclisniñ azası Usein Çapuh da iştirak ettiler.

Serbest şekilde keçken subette Mustafa Cemilev ve Vitaliy Kliçko Ukrainadaki içtimaiy-siyasiy meselelerni ve işbirlik perspektivalarını muzakere ettiler.

Körüşüv iştirakçileri Ukrainanıñ, demokratik devlet olaraq, inkişaf imkânlarını belgilegen printsipial sualleri boyunca taraflarnıñ pozitsiyalarınıñ bir olğanını qayd ettiler.

“Demokratik esaslarını kütken qırımtatar halqınıñ milliy areketi uzun tarihke malik. Bundan sebep, er saada siz ile işbirlik qurmaq isteymiz”, — dedi Vitaliy Kliçko.

Mustafa Cemilev, öz nevbetinde, qırımtatar halqınıñ menfaatları közge alınğan alda “Udar” firqasına qol tutmağa azır olğanını bildirdi.

Körüşüv soñunda iştirakçileri eki tarafnıñ menfaatlarına faydalı ola bilecek bütün sualler boyunca yaqın işbirlik aqqında añlaştılar