Qırımğa 265 biñge yaqın qırımtatar qayttı

11.05.20160:19

2011 senesiniñ başına Qırımğa, şeer şuralarnıñ ve rayon memuriyetlerniñ şuraları bergen malümatlarğa köre, 265 biñge yaqın qırımtatar ve 4907 sürgün etilgen ermen, bulğar, yunan ve alman qayttı ve qayd olundı. Bu aqqında Qırım MC Milletlerara munasebetler ve sürgün etilgen vatandaşlarnıñ meseleleri boyunca cumhuriyet komitetinde haber ettiler.

Yarımada ealisiniñ (Aqyar şeerini almadan) 13% sürgün etilgen vatandaşlar.

Cumhuriyet komiteti bildirgeni kibi, bugünge Qırımda 300 yaqın repatriantlarnıñ toplu yaşağan qasaba ve massivleri şekillendi, şu cümlede 6 ermeni, yunan, bulğar ve alman qasabaları. Olardan üçte ekisi suv ile teminlengen, 87% — elektrik ağınen. Gaz ile teminleviniñ seviyesi 25%’dan çoq degil. Kanalizatsiya ve qattı töşemeli yollar yoq derecededir. Repatriantlarnıñ yerleşüvi ile vaziyet, hususan, köy yerlerde ağır, anda iş meselesi de bar.

 

1991 senesinden başlap, devlet büdjetinde, 1999 sensinden – Qırım muhtar Cumhuriyetiniñ büdjetinde sürgün etilgen vatandaşlarnıñ yerleştirilüvine para ayırıla, umumen bugünge qadar – 1259,2 mln. grn. 456,1 biñ kvadrat m. ev-mesken alındı, 1202,6 km elektrik ağı qoyuldı, 894,2 km — suv ağı, 486,8 km – gaz ağı, 113,3 km çaqıl töşemeli yol qoyuldı, 9 mektep açıldı. Medeniyet ve tarih abideleri restavratsiya etildiler.

1991-2010 seneleri devlet parası ile qurulğan 3,6 biñden ziyade ev-mesken ve satıp alınğan 2700 ev ve daire yardımı ile tahminen 36 biñ insan mesken ile teminlendi. Ondan da ğayrı, 130 biñ qırımtatar bütünley ya da qısmen öz evleriniñ qurucılığını bitirdiler ya da mustaqil tarzda mesken satıp aldılar.

Bunınen beraber, devlet ev-meskenini almaq içün sırada 7,5 biñ qoranta turmaqta. 16 biñ qoranta para yetişmemezlikten ev qurucılığını bitirip olamay.