Uyğur PEN merkeziniñ prezidenti Hayser Abdurasul Ozgun Mİlliy Meclisni ziyaret etti

11.05.20160:19

2012 senesi mart 23 künü Meclis ofisinde Qırımtatar Milliy Meclisiniñ azaları Şevket Qaybullayev, Ali Hamzin ve Zair Smedlâyev Halqara PEN-klubı yanında Uyğur PEN merkeziniñ prezidenti Hayser Abdurasul Ozgun ile körüştiler.

Körüşüvde belli qırımtatar yazıcısı Üriye Edemova ve "Yıldız" mecmuasınıñ baş muarriri Dilâver Osmanov da iştirak ettiler.

İsveçreden kelgen musafir Hayser Abdurasul Ozgunniñ aytqanına köre, Qırımnı ziyaret etmekten baş maqsat- Qırım ile tanış olmaq ve Qırımtatar Mİlliy Meclisiniñ azalarınen, bunıñ kibi de qırımtatar yazıcı ve şairlerinen körüşmektir. Subetimizniñ baş mevzusı — Ural-Altay Pen-klubnıñ VI Halqara Konferentsiyasını (VI Ural-Altay PEN-birliği Konferansı) keçirüv meselesidir, dep qayd etti Ozgun.

 

Hayser Ozgun, keçirilmesi közde tutulğan konferentsiya boyunca dünyaca belli uquqqoruyıcı, Qırımtatar Milliy Meclisiniñ reisi Mustafa Cemilevniñ fikirinen pek meraqlanğanını bildirdi. "Mustafa Cemilevnen körüşüv menim içün şereftir, çünki o, müsülman ve türk dünyasınıñ büyük ğururıdır", — dedi Ozgun.

Hayser Ozgun Halqara PEN merkeziniñ terkibiy qısmı olğan ve ofisi İsveçrede yerleşken vekâletligi, Qazahistanda bulunğan Uyğur PEN merkeziniñ meydanğa kelüv tarihını tafsilâtlı tarif etti. Uyğur PEN-merkezi öz konferentsiyalarını Türkiye, Moğolstan, Macaristanda keçirip, nevbetteki dörtüncisini Qırımda ötkermek qararını alğan. "Mezkür qarar tesadüfen alınmadı, — devam etti musafir. – Bizim halqlarnı bir çoq şey, birinci nevbette tilimizniñ beñzerligi birleştire. Aramızda deyerlik farq yoq, olsa da – pek az". Konferentsiyanı 2012 senesi yazda, bes belli qırımtatarlarnıñ sabıq paytahtı – Bağçasarayda keçirmek planlaştırıla. Tedbirde türk tilli devletler, bunıñ kibi Yaponiya, Koreya ve Estoniyadan kelgen delegatlar iştirak etecek. Konferentsiyanıñ iş tilleri – qırımtatar ve ingliz tilleri olacaq.

Malümat içün:

PEN-klub — çeşit edebiy janrlarda çalışqan professional yazıcı ve jurnalistlerni birleştirgen, ükümetten tış halqara teşkilâttır. Onıñ maqsadı bütün dünya yazıcılarınıñ icadiy işbirligine qoltutmaq, bunıñ kibi de bediiy tercime tecribesini inkişaf ettirmektir. Teşkilât apste bulunğan, maddiy zorluqlar çekken, siyasiy rejim tarafından basqı etilgen yazıcılarğa qoltuta.