İslam dünyasınıñ başı Ukrainanı İslam Cemiyeti Teşkilâtınıñ terkibinde köre

11.05.20160:19

2014 senesi aprelniñ 10-da qırımtatar halqınıñ lideri, ukraina halq deputatı Mustafa Cemilev İslam Cemiyeti Teşkilâtınıñ (İCT) Baş kâtibi İyad ben Amin Madani ile körüşti.

Körüşüv İCT Baş kâtibiniñ teşebbüsi ile Cidda (Suudi Arabistan) şeerinde Teşkilâtınıñ ştab-kvartirasında olıp keçti.

Körüşüv devamında taraflar Ukrainada ve Qırımdaki siyasiy vaziyetni ve halqara işbirlikniñ esas yonnelişini muzakere ettiler.

İCT Baş kâtibi Madani Ukrainanıñ İslam Cemiyeti Teşkilâtınıñ terkibine kirmesiniñ imkânı ve zarurlığı aqqında fikirini bildirdi. Baş kâtipniñ qayd etkenine köre, Ukraina bu teşkilâtnıñ terkibine kire bile, çünki Rusiye kibi, müsülman olmağan devlet te bu İCT azası ola, anda millionlarca müsülman yaşamaqta, lâkin ona kirmek içün, Ukraina yolbaşçılığınıñ özü resmiy şekilde muracaat etmelidir.

Baş kâtip hatırlattı ki, İCT-na kirgen devlet İslam inkişaf bankınıñ bergen kreditleri ve yardım programmalarınen faydalana bile. Bir qaç aydan soñ İCT azaları olğan ülkelerniñ tış işler nazirlerniñ körüşüvi olıp keçecek. Bu körüşüvde Qırımtatar Milliy Meclis vekilleriniñ de iştirak ete bilecekleri aqqında qonuşıldı.

Öz nevbetinde Mustafa Cemilev İCT yolbaşçılığına Ukraina ve Qırımda yüz bergen adiseler munasebetinen qırımtatar halqına qol tutqanı içün minnetdarlığını bildirdi.

Körüşüv devamında taraflar Qırımda milliy mektepler qurucılığınıñ istiqbalini ve islam dünaysınıñ aliy oquv yurtlarında qırımtatar yaşlarınıñ oqumaq ihtimalını muzakere ettiler.

Mustafa Cemilevge muracaat eterek, İCT Baş Kâtibi dedi ki, qırımtatar halqınıñ vaziyetini ögrenecek mahsus nezaretçilerniñ yollanulması aqqında sual baqılacaq ve qırımtatar halqınıñ liderine Qırımdaki vaziyet aqqında daima İCT-na haber bermege rica etti.

Körüşüvde Meclis yolbaşçısınıñ muavini Aslan Ömer Qırımlı ve Qurultay delegatı Rustem Ümerov da iştirak ettiler.