Qırımda Qırımtatar halqı soyqırımınıñ 70 yıllığına azırlıq başlandı

11.05.20160:19

2014 senesi fevral 3 künü Qırımtatar halqı soyqırımınıñ 70 yıllığı munasebetinen hatıra tedbirlerini azırlav ve keçirüv boyunca teşkiliy komitetniñ birinci toplaşuvı olıp keçti.

Teşkiliy komitet erkânı Milliy Meclisniñ 2014 senesi yanvar 25-te alğan qararınen tasdiqlandı.

Toplaşuv devamında Qırımtatar halqı soyqırımınıñ 70 yıllığı munasebetinen hatıra tedbirlerini azırlav ve keçirüv, bunıñ kibi de Bütünqırım matem mitingi iştirakçileri yürüş planınıñ leyhası muzakere etildi ve esas olaraq qabul etildi. Lâkin toplaşuvnıñ bayağı bir qısmı regional meclisler, Qurultay delegatları ve qırımtatar cemaat teşkilâtları tarafından hatıra tedbirlerni keçirüvge dair tekliflerini diñlev ve muzakere etüvnen keçti.

Cümleden Meclis reisiniñ muavini Nariman Celâl 2014 senesi mayıs 18-ne qadar semetdeşlerimiz arasında beyanat imzalav kompaniyasını keçirmekni teklif etti. Beyanatnıñ metininde qırımtatar halqınıñ aqları ve yerleşmesi meseleleri boyunca devlet ve cumhuriyet akimiyetine bildirilgen talaplar yer almaq kerekler.

"Bundan da ğayrı, çoqusı semetdeşlerimiz 1999 senesinde yapılğanı kibi cayav narazılıq yürüşini keçirmek ve böyleliknen halqımıznıñ bugünki alına parmaq arasından baqılğanı devam etkenini köstermek teşebbüsinen çıqalar, — dedi N. Celâl – Bazıları ise Kiyevgece piyade ketmek ve anda Ukraina Yuqarı Şurası ve Nazirler Kabineti binaları qarşısında talaplarımıznı bildirmekni teklif eteler".

Qurultay delegatı, "ATR" telekanalı informatsion programmamalar reberi Şevket Memetov hatıra tedbirleri çerçivesinde mart –aprel aylarında Qırımnı yeşillendirmek boyunca Bütünqırım aktsiyasını ötkermekni teklif etip, bu fikirge cumhuriyet akimiyeti de qoltutacağına eminligini bildirdi. Onıñ aytqanına köre, aktsiyada yalıñız qırımtatarları degil de, Qırımnıñ bütün sakinleri iştirak etmeli, çünki 1944 senesiniñ sürgünligi – bütün Qırımnıñ accısı ve faciasıdır.

Meclis reisiniñ muavini Ayder Acimambetov haber etkenine köre, qırımtatar yaşlar teşkilâtları er yılki anane boyunca mayıs 18 arfesinde sürgünlik qurbanlarınıñ hatırasına qoyulğan abide ve hatıra taşlarınıñ etrafını temizlemege azırlanalar.

Meclisniñ Tışqı alâqalar idaresiniñ başı Ali Hamzin 2014 senesi mayıs 18-de Qırımtatar halqı soyqırımınıñ 70 yıllığı munasebetinen hatıra tedbirlerini qırımtatar diasporası yaşağan devletlerde Ukraina elçihaneleriniñ qarşısında numayışlar, bunıñ kibi de Türkiyeniñ qırımtatar dernekleri faaliyet köstergen şeerlerde piyade yürüşlerni keçirmek ğayesinen paylaştı.

Toplaşuv iştirakçileri kütleviy tedbirler keçirilecek yerlerde cemaat tertibini ve Bütünqırım matem mitingi iştirakçileriniñ havfsızlığını teminlev meseleleri de baqıldı.