23 sentâbr künü Ukrainada Pakistannıñ Fefqulâde ve Murahhas elçisi Ahmed Navaz Salim Melanı refiqası Şarla Salim ile Meclis yolbaşçısı Mustafa Cemilev qabul etti.
Körüşüvniñ başında Ukrainada Pakistan elçisi Ahmed Navaz Salim XX asırda Qırımdan sürgün etilgen, amma küç tapıp, Vatanına qaytqan qırımtatar halqınıñ cesürligine yüksek qıymet kesti.
“Qırımtatarlarnıñ tarihında facialı saifeler, Vatanından uzaq keçirilgen çoq yıllar ve Qırımğa ağır avdet esnası öz milliy özgünligi ve milletniñ birligini saqlağan qırımtatar halqınıñ cesürligine ayrette qalmağa esas bere”, — dedi pakistanlı diplomat, Meclis yolbaşçısına muracaat eterek. Ayrıca qırımtatar halqınıñ birligi aqqında aytıp, Meclisniñ rolüni qayd etti. Elçi qırımtatar halqınıñ ilerideki inkişafında eminligini bildirdi.
Qırım regionınıñ içtimaiy-iqtisadiy imkânları muzakere eterek, Pakistan elçisi öyle fikirni bildirdi ki, “Ukraina ve Qırım çoqusı devletler içün istenilgen iqtisadiy işbirlik yeri olaraq köreler. Yaqın vaqıtta Pakistan Ukraina ile siyasiy, iqtisadiy ve medeniy munasebetlerniñ keñişletme imkânlarını baqıp çıqa”.
Meclis reisi M.Cemilev pakistanlı diplomatnı selâmlaraq, ayrıca qayd etti ki, qırımtatar halqı içün Pakistan ruh ile yaqın ülke, İslâm dinini küte, ve öz bağımsızlığı içün küreşte ağırlıqlarğa rastkelgen edi. “Qırımtatarlarnıñ taqdiri facialı oldı, biz 50 yıldan ziyade vatanımızğa qaytmaq içün küreş alıp bardıq ve bu yıllar içinde iç birisiniñ qanı tökülmegenine, ilk evelâ, milliy areketniñ demokratik printsipleri sayesinde, bugün ğururlanamız”, — qayd etti Meclis yolbaşçısı. Ayrıca qayd etti ki, qırımtatarlar bugün öz aq-uquqları içün küreşni devam eterek, özlerini Ukraina vatanperverleri, devlette demokratiya inkişafınıñ avrointegratsiya tarafdarları olaraq sayalar.
“Yazıq ki, qırımtatar halqınıñ içinde yüksek seviyeli öz-özüni teşkil etilüvine baqmadan, bugün esas havflardan biri – özgünligimizniñ ğayıp etilmesidir. Bunıñ sebebi – Ukrainanıñ 20 yıl bağımsızlığı devamında sürgün etilgen qırımtatar halqınıñ inkişafı boyunca umumdevlet yanaşuvnıñ olmamasıdır, bu ise, öz nevbetinde, kerekli qanunlarnıñ qabul etilmegeni içün ola. Bunıñ episi milliy tasil sistemasına da menfiy tesir ete, on aladan tek biri ana tilinde tasil ala bile, o da tolu programma boyunca degil”, — dedi Meclis yolbaşçısı.
Meclis reisi ayrıca alâ daa Vatanından uzaq qalmağa mecbur olıp, kelip olamağan qırımtatarlar aqqında da ayttı. “Bu mesele biñlernen qırımtatar ailelerinden keçe ve halqara tecribesinde insan aqları bozuluvınıñ ağır şekli olaraq sayıla”, — qayd etti Cemilev.
Mustafa Cemilev diplomatnıñ diqqatını şuna qayd etti ki, Meclis öz ğayretlerini qırımtatar halqınıñ birleşmesine, vatandaşlarnıñ öz vatanına qaytuvına, içtimaiy-iqtisadiy ve uquqiy suallerniñ çezilüvine sarf ete. Onıñ fikrine köre, Ukraina bugün bir özü bu meseleni çezip olamay. “Bu munasebet ile, biz Qırımtatar halqınıñ öz Vatanında aq-uquqlarınıñ tiklenüvi, Ukrainada inkşafınıñ kefaleti ve havfsızlığınıñ teminlevi sualleri boyunca halqara forum çağırmaq teşebbüsi ile çıqamız”, — dedi Meclis yolbaşçısı.
Dialog vaqtında taraflar qırımtatar iş adamlarınıñ Felestin biznes alanları ile işbirlik istiqballeirni muzakere ettiler, diplomat Meclis yolbaşçısına qırımtatar iş adamlarını tanışuv ziyareti ile 2011 senesi oktâbr ayında Karaç şeerinde keçirilecek iqtisadiy sergige yollamağa teklif etti.
Pakistan elçisine muracaat eterek, Meclis yolbaşçısı qayd etti ki, “qırımtatar faktornı Ukrainada hristian Ukraina ve islam dünyası arasındaki köpür olaraq qabul etmek kerek”.
Qırım ziyareti çerçivesinde elçi refiqası ile Bahçisaraynı ziyaret etip, qırımtatar halqınıñ tarihı ve medeniyeti abidelerinen tanış olmağa planlaştıralar.