Boğurça qasabasınıñ qırımtatar tilli mektep talebeleri V.Çernovolnıñ hatırasını añdılar.

11.05.20160:19

24 mart künü Boğurça qasabasındaki 42  qırımtatar milliy mektebinde qırımtatar halqınıñ dostu, belli ukrain siyasiy erbabı, Ukraina Halq Areketniñ(Ruh) tesisçilerinden biri- Vãçeslav Çornovoniñ hatırasını añdılar. Merasim mektep hadimleri ve milliy areket iştirakçileri tarafından azırlanıldı.

Tedbir milliy gimnnen başladı, soñra qırımtatar milliy areketniñ azası Zampira Asanova öz alğış sözünde Vãçeslav Çernovol ve beraber çalışqanları aqqında sıcaq hatıravlarınen paylaştı. Tadbirge kelgen milliy areket veteranı Enver Musiddinov Çernovolnıñ hatırasını dua ile şerefledi. Qırım Yuqarı şurasınıñ deputatı, belli jurnalist L.Pilunskiyniñ aytqanlarına köre, şimdiki vaqıtta ukrain akimiyetinde Çernovolğa oşağan adam yoq. ‘Ukrainanıñ içinde halqnı birleştire bilecek insan yoq. O ise qırımtatar halqı ile dostlaşqan, onı añlağan ve desteklegen edi. O aqıqat tarafdarı edi.’-dep qayd etti o. Bundan da ğayrı, Pilunskiy mektepke V.Çernovolnıñ hayatı, faaliyeti ve vefatı aqqında eki kitapnı bağışladı.

Malümat: V.Çernovol – ukrain siyasiy erbabı, sovet dissidenti, jurnalist, Ukrainanıñ halq areketine temel etkenlerden biri, 1937 senesi 24 dekabrde doğdı. 1958 senesi öz siyasiy noqta-i nazarlarından dolayı ilk problemlerge rastkelip, Jdanov şeerine bir yılğa ketmege mecbur oldı.

 

V.Çornovol üç kere mahkum etilgen edi.  İlk mahkumınıñ sebebi- ‘Горе от ума’(‘Aqıldan belã’) adlı kitabı oldı. 1980 senesi mayısta üçünci kere mahkum etilip, 5 yılğa Yakutiyağa yollanıldı. Amma 1983 senesi azat olunsa bile, Ukrainağa qaytmağa tek 1985 senesi aqqı peyda oldı.

Qayd etmelimiz ki, V.Çernovol Mustafa Cemilevnen sovet devrinde bağqaca tüşüngenlerge dair siyasiy esnaslar vaqtında tanış olğan edi. 1989 senesi 8-10 sentãbr künleri Çernovolnıñ iştiragi ile ‘Ukrainanıñ Halq areketi- perestroyka oğrunda’ meydanğa ketirildi. (İleride Ukraina Halq areketi-UHA; Tek UHA-niñ programmasında qırımtatar devletçiliginiñ tiklenmesini közde tutqan madde bar. 1999 senesi 25 mart künü Kirovograddan qaytqan V.Çornovol yol qazasına oğray. V.Çornovol Kiyevde defn etildi.

Çornovolnıñ ölüminden nevbetteki künü o vaqıttaki iç işler naziri Yuriy Kravçenko, tehqiqniñ ilk neticelerini beklemezden, UHA yolbaşçısı yol qazasında keçingenini ve V.Çornovolğa suiqast variantı atta baqılmağanını bildirdi. Soñra(2000) esas şaat apansızdan yürek hastalığından vefat etti.

QHA