Milliy Meclis azaları Azerbaycan Cumhuriyetiniñ Ukrainadaki elçisinen körüştiler

11.05.20160:19

25 noyabrde Milliy Meclisniñ merkeziy ofisinde Milliy Meclis azaları Azerbaycan Cumhuriyetiniñ Ukrainadaki Fevqulâde ve Murahhas Elçisi Eynulla Madatlinen körüştiler. Körüşüvde Milliy Meclis reisiniñ muavini, QMC Yuqarı Şurasınıñ Milletlerara munasebetler ve sürgün etilgen vatandaşlarnıñ meseleleri boyunca daimiy komissiyasınıñ reisi Remzi İlyasov, Milliy Meclisniñ Kâtibliginiñ reberi Zair Smedlâyev ve Milliy Meclisniñ İçtimaiy teşkilâtlar ve KİV ile alâqalar boyunca İdareniñ Reberi, “Avdet” gazetasınıñ baş muarriri Şevket Kaybullayev.

Körüşüv devamında Elçi bulunğanlarğa öz ziyaretiniñ maqsadları aqqında, şu cümlede Aqmescitte Qırımdaki azerbaycan diasporasınıñ temsilcilerinen körüşüvi aqqında ve qayd etti ki, Ukrainada Azerbaycannıñ eñ çoq sayılı diasporalından biri yaşamaqta.

Öz nevbetinde Meclis azaları musafirlerge öz tarihiy vatanına qaytqan qırımtatar halqınıñ meseleleri aqqında tarif ettiler. Körüşüv devamında ana tilinde tasil meseleleri de muzakere etildiler. Em de büyük cami qurucılığı içün topraq berilmesinde çıqqan davalar, bayram künleri qırımtatarlarnıñ toplu yaşağan yerlerindeki camilerde peyda olğan oñaytsızlıqlar aqqında da aytıldı.

 

Elçiniñ Qırımnıñ Ükümetinde qırımtatarlarnıñ temsilciligi aqqında suallerine cevap berip, Komissiya reberi qayd etti ki, yaqında keçken saylavlarda Ükümetke tek 5 insan keçti, olardan yüksek vazifelerde olğanları da bar — QMC Yuqarı Şurasınıñ Milletlerara munasebetler ve sürgün etilgen vatandaşlarnıñ meseleleri boyunca daimiy komissiyasınıñ reisi Remzi İlyasov, Qırım Ükümetiniñ vitse-premyeri Aziz Abdullayev ve QMC Milletlerara munasebetler ve sürgün etilgen vatandaşlarnıñ işleri boyunca cumhuriyet komitetiniñ reisi Edem Dudakov. Ve, tabi ki, bu, halqınıñ inkişafı ve umumen meselelerinen bağlı suallerniñ çezilüvinde ola bilecek imkânlarnı sıñırlay.

Hatırlatayıq ki, Ukrainada Azerbaycannıñ Elçisi Qırımğa Halqara qaradeñiz içtimaiy forumda iştirak etmek içün keldi, forum 2010 senesi 26-27 noyabr künleri Yalta şeerinde Ukraina Prezidenti V.Yanukoviçniñ yolbaşçılığında keçirilecek.

Elmara MUSTAFAYEVA