Yazıcılarnı daa faal olmağa çağırdılar

11.05.20160:19

29 fevral künü Qırım Yuqarı şurası milletlerara munasebetler ve sürgün etilgen vatandaşlar boyunca daimiy Komissiyasında qırımtatar yazıcılar birliginiñ keñiş toplaşuvı olıp keçti.

Mezkür toplaşuvda Daimiy Komissiyanıñ reisi Remzi İlyasov, QMC milletlerara munasebetler işler ve sürgün etilgen vatandaşlar meseleleri boyunca Komitetniñ reisi Edem Dudakov, Qırımtatar Milliy Mecliste tasil ve medeniyet idaresiniñ yolbaşçısı Safure Kacametova ve KHV vekilleri iştirak ettiler.

Soñ zamanlarda edebiyat ve maneviyat inkişafına bayağı diqqat ayırıla. Yazıcılar ve şairler öz problemlerini özleri çezmege mecbur qaldılar. Birisi eser yadı, amma bastırıp olamay. Başqası neşir etti, amma kitaplarnı satıp olamay, daa birisi ise romannı bitirdi amma gonorarnı almağance derc etilmesine ruhset bermey. Yani problemler yeterli.

Toplaşuvda edebiyatnıñ kütleviyleştirilmesi, qalemini sınap başlağan yaş yazıcılarnen çalışuv, eserniñ aqqını berüv ve muellif haqlarını qoruv kibi meseleler muzakere etildi. Qırımtatar yazıcılar Birliginiñ reisi Riza Fazıl qırımtatar edebiyatınıñ vaziyeti yıl yıldan mürekkepleşkeni, devlet yardım köstermegeni, edebiyatşınaslarğa iç diqqat ayırmağanı aqqında bildirdi.

‘Yıldız’ derginiñ muarriri Dilãver Osmanov mecmuanıñ vaziyeti, planları aqqında ikãye etti. Yazıcılar Birliginiñ azaları Ablãziz Veliyev, Uriye Edemova, Şeryan Ali, Zakir Kurtnezir qırımtatar tilinde edebiy-bediy neşriyatnıñ tiklemek zarurlığı, muellif halqarını berüv, yazıcalarnı taqdirlev, ‘İlham’ edebiy birleşmeniñ faaliyetine destek kösterüv, yaş yazıcılar almanahını çıqaruv kibi meseleler çezlüviniñ zarurlığını qayd ettiler.

 

Safure Kacametova, yazıcılarğa daa faal olmağa, belli bir leyhalarnen hükümet organları, halqara teşkilãtlarğa muracaatlarda bulunmağa teklif etti.

Ögümizde turğan meselelerni çezmek içün konkret adımlar atmaq kerek.

Yazıcılar ‘Maarifçi’niñ ‘Atalıq’ programmasına destek kösterdiler ve assotsıatsıya azalarınen birlikte Qırımnıñ bir çoq mekteplerinde bulundılar. ‘ Bu programmanı yazıcılar özleri devam etseydi, yahşı olur edi. Qırımtatar tilinde bediy edebiyat muarririyetini ‘Qırımdevpekoquvneşir’ neşriyatı esasında canlandırmaq mümkün. Yazıcılar ‘İlham’ birleşmesine yolbaşçılıq yapmalılar’,-dedi S.Kacametova.

Edem Dudakov ve Remzi İlyasov yuqarıda aytılğanlarını közge alıp, öz nevbetinde yardım etmege azır olğanını bildirdiler ve yazıcılarnı daa faal olmağa çağırdılar.

Meclis -inform