Тазие / Ферат Усеин огълу / Ferat Usein oğlu

11.05.20160:19

8-октябрьде Акъмесджитте девамлы хасталыкътан сонъ догъма Айсерезли (Сувдагъ районы), бу сене язда 76 яшыны толдургъан, миллий арекетимизнинъ энъ корюмли фаалеринден бири Ферат Усеин огълу Амет Уста вефат этти.

1944 сенеси къорантасынен ве бир чокъ койдешлеринен берабер Самаркъанд дживарындаки колхозларнынъ бирисине тюшкен Ферат, бала олса да, дигер ватандашлары ве яшдашлары сырасында, инсаниетликтен тыш олгъан мунасебет ве дешетли зулумны башындан кечирди.

Лякин онынъ истидаты бундан устюн олды – чешит маниаларгъа бакъмадан, о мувафакъиет иле мектепни, сонъра техникумыны битирип, къуруджы зенаатыны менимседи. Тешкилятчылыкъ, месулиетчилик къабилиети ве терен бильги саиби олгъан Ферат къыскъа вакъыт ичинде башта "Узглавлесстрой" ишханенинъ заводында, сонъра бу буюк идаренинъ баш муэндиси вазифесинде чалышты.

Реберликнен багълы ишлерни беджермекнен бир сырада, шу 1960 сенелерининъ башындан о, хош тайинленмек ве яхшы яшамакъ дегиль, шевкъатсыз такъип ве аджджы мешакъат иле толу олгъан дигер бир ёлны – Ватанындан къувулгъан миллетининъ акъ-укъукълары ве адалет тикленильмек огърунда курешни сечип алды ве омюрнинъ сонъунадже мезкюр ёлдан таймады.

Тез вакъыт ичинде Самаркъанд тешеббюсчилери арасында сайгъы-итибар ве ишанч къазангъан Ферат агъа чешит севидеки – виляетара, джумхуриет, улькелерара мушаверелер ве топлашувларда иштирак этип, кениш суретте таныла. О, чешит весикъалар азырланмасына иссе къошып, бунынънен берабер, дефаларджа Москвагъа барып, сафдашларынен берабер бу мураджаатларны Советлер бирлигининъ ёлбашчыларына еткизмек арекетлеринде де булунды.

Мукъайтлыкънен, сабырнен, амма даима исрарлыкънен, акъыл-идракънен чалышмагъа бильген Ферат агъанынъ миллий давамыздаки иштираки акимиет ве гэбистлер тарафындан сезильмей къалмады – оны иштен бошаттылар.

1968 сенеси о, Къырымгъа кочеджек ола. Бир сыра ватандашларнен берабер оны меджбурий алда Ташкентке кетирип ташлайлар. Ферат агъа кене Акъмесджитке къайтып келе ве мында олгъан тешеббюсчилер, векиллернен бир сафда курешни девам эте. Сонъра Херсон виляетининъ Аскания-Нова къасабасына барып ерлешмеге меджбур ола. Украинадаки вазиет акъкъында Озьбекистангъа мунтазам суретте малюматлар ёллап тура. Сагълыгъы зайыфлашкъанына бакъмадан, 1987 сенеси Москвада, Къызыл мейдандаки вакъиаларда, нумаишлерде иштирак эте. 1995 сенеси къорантасынен Акъмесджитке къайта. Оны чешит миллий тедбирлерде корьмек мумкюн эди.

Ферат агъа йымшакъ табиатлы – достларына нисбетен атта юваш, муляйим, мераметли, терен бильгили, адалет дуйгъусы индже, эм де рухтан ич тюшмеген, гонъюль котермеге бильген, бир сой сафдашларычюн нумюне олгъан инсан эди. О, бизим хатырамызда тамам бойле де къаладжакъ.

Ферат Усеин огълунынъ къорантасына ве якъынларына самимий тазиемизни бильдиремиз ве баш сагълыгъы тилеймиз.

Алла рахмет эйлесин.

Миллий Меджлис азалары

______________________________________________________

Taziye

Ferat Usein oğlu

8-oktãbre Aqmescitte devamlı hastalıqtan soñ doğma Ayserezli (Suvdağ rayonı), bu sene yazda 76 yaşını toldurğan, milliy areketimizniñ eñ körümli faallerinden biri Ferat Usein oğlu Amet Usta vefat etti.

1944 senesi qorantasınen ve bir çoq köydeşlerinen beraber Samarkand civarındaki kolhozlarnıñ birisine tüşken Ferat, bala olsa da, diger vatandaşları ve yaşdaşları sırasında, insaniyetlikten tış olğan munasebet ve deşetli zulumnı başından keçirdi.

Lãkin onıñ istidadı bundan üstün oldı- çeşit manialarğa baqmadan, o muvafaqiyet ile mektepni, soñra tehnikumnı bitirip, qurucı zenaatını menimsedi. Teşkilãtçılıq, mesüliyetçilik qabiliyeti ve teren bilgi saibi olğan Ferat qısqa vaqit içinde başta ‘Uzglavlesstroy’ işhaneniñ zavodında, soñra bu büyük idareniñ baş muendisi vazifesinde çalıştı.

Reberliknen bağlı işlerni becermenknen bir sırada, şu 1960 seneleriniñ başından o, hoş tayinlenmek ve yahşı yaşamaq degil, şefqatsız taqip ve accı meşaqat ile tolu olğan diger bir yolnı- Vatanından quvulğan milletiniñ haq-huquqları ve adalet tiklenilmek oğrunda küreşni seçip aldı ve ömürniñ soñunace mezkür yoldan taymadı.

Tez vaqıt içinde Samarkand teşebbüsçileri arasında sayğı- itibar ve işanç qazanğan Ferat ağa çeşit seviyedeki-vilãyetara, cumhuriyet, ülkelerara muşavereler ve toplaşuvlarda iştirak etip, keniş sürette tanıla. O, çeşit vesiqalar azırlanmasına isse qoşıp, bunıñnen beraber, defalarca Moskvağa barıp, safdaşlarınen beraber bu muracaatlarnı Sovetler birliginiñ yolbaşçılarına yetkizmek areketlerindende de bulundı.

Muqaytlıqnen, sabırnen, amma daima israrlıqnen, aqıl-idraqnen çalışmağa bilgen Ferat ağanıñ milliy davamızdaki iştirakı akimiyet ve gebistler tarafından sezilmey qalmadı-onı işten boşattılar.

1968 senesi o, Qırımğa köçecek ola. Bir sıra vatandaşlarnen beraber onı mecburiy alda Taşkentke ketirip taşlaylar. Ferat ağa kene Aqmescitke qaytıp kele ve mında olğan teşebbüsçiler, vekillernen bir safda küreşni devam ete. Soñra Herson vilãyetiniñ Askaniya-Nova qasabasına barıp yerleşmege mecbur ola. Ukrainadaki vaziyet aqqında Özbekistanğa muntazam sürette malümatlar yollap tura. Sağlığı zayıflaşqanına baqmadan, 1987 senesi Moskvada, qızıl meydandaki vaqialarda, numaişlerde iştirak ete. 1995 senesi qorantasınen Aqmescitke qayta. Onı çeşit milliy tedbirlerde körmek mümkün edi.

Ferat ağa yımşaq tabiatlı-dostlarına nisbeten atta yuvaş, em de ruhtan iç tüşmegen, göñül kötermege bilgen, bir soy safdaşları içün nümüne olğan insan edi. O bizim hatırımızda tamam böyle de qalacaq.

Ferat Usein oğlunıñ qorantasına ve yaqınlarına samimiy taziyemizni bildiremiz ve baş sağlığı tileymiz.

Allah rahmet eylesin.

Milliy Meclis azaları