QHA

11.05.20160:19

Ansamblniñ birinci çıqışı olıp keçti

2011 senesi 7-8 yanvar künleri Türkiye Cumhuriyeti Milliy tasil meclisi zalında (Ankara) “Qırım Tatar Müzik ve Dans Gecesi” kontsert turu çerçivesinde “Qırım” qırımtatar folklor ansamblniñ birinci çıqışı olıp keçti, ansamblniñ yolbaşçısı Ukrainada ve Tatarstanda nam qazanğan sanat erbabı Server Kakura. Ankaradaki Qırımtatarlarnıñ yardımlaşma ve medeniyet derneginiñ merkeziy ofisi teşkil etken bu kontsert ile ansambl Türkiyeniñ 12 şeerinde çıqışta bulunacaq.

Programmanıñ başında Merkeziy ofisniñ Yaşlar komissiyası tarafından teşkil etilgen “Ankara Haytarma bend” ansambli qırımtatar yırlarnı icra etti.

“Qırım” ansambli qırımtatarlarnıñ Qırımğa avdetinden soñ birinci teşkil olunğan qırımtatar ansambli edi. Öz ustalığı ile seyircilerde çıqışlarına büyük meraq doğuralar.

Ansambl iştrakçileri Qırımda sevilgen yırlarını icra ettiler, sanalaştırmalarını numayış ettip, türk seyircilerine Qırım müitini yaşattılar.

Programmada istidatlı qırımtatar şairi Riza Yusuf da işitrak etip, qırımtatar klassiklerniñ şiirlerini oqudı.

Kontsertniñ soñunda Türkiyedeki Qırımtatarlarnıñ yardımlaşma ve medeniyet derneginiñ reisi doktor Ahmet İhsan Qırımlı “Qırım” ansambliniñ 20-yıllığı munasebeti ile episi artistlerge qırımtatar medeniyeti inişafına qoşqan isseleri içün, fahriy yarlıqlar taqdim etti.

QHA

“Odun-bazar qapusı”nda daa bir etnografik turnıñ açılması planlaştırıla

Kezlevdeki “Odun-bazar qapusı” Qırımtatar medeniy-etnografik merkezinde daa bir etnografik turnıñ açılması planlaştırıla, “Yelken” turistik şirketiniñ müdiri, “Kezlev qapuları” medeniy-etnografik merkeziniñ müdiri Dilâra Yakubova nasıl tur olacağını sır olaraq qaldırdı, azırlıq işleri tamamlanğan soñ, malümat belli olacaq.

“Şimdilik tek şunı ayta bilem ki, klassik turizm esasında obyektimizde olacaq tur, onı yazğa yaqın azırlamağa tırışırıq”, — dedi Dilâra hanım. Hatırlatayıq ki, 2010 senesi 18 iyun künü Kezlevdeki “Odun-bazar qapusı” Qırımtatar medeniy-etnografik merkezinde yañı turistik mahsulatnıñ taqdimi olıp keçti – qırımtatar medeniy-etnografik turlar. Hususan, taqdimname devamında “Kezlev azbarı” etnoqavehane taqdim etildi. “Odun-bazar qapusı” müzeyi ve qale qapuları boyunca ekskursiya keçirildi, anda “Nişan” adeti kösterildi. Soñra musafirler “Ceval” etnografik restoranında keçirilgen kulinar turında iştirak ettiler. Tedbir iştirakçilerine aşçı ustalığınıñ dersini berdiler ve şarq yemeklerini pişirmege ögrettiler.

QHA