Aprel 15 künü İslâm Terek rayonındaki Caylav Saray köyüniñ stadionında ve aprel 22-de Aqmeçit stadionında Meclisniñ ekinci Kubogına futbol turniri olıp keçti. Bu turnirler adet üzre Ukraina ve qırımtatar gimnlerinen başlay, bundan soñ yerli imam dua oquy.
Turnir başlamazdan evel oyun tertibi belgilendi. Matçta professional akemler akemlik etti: Seytümer Şalverov, Roman Şalverov, Ernest Bekirov, Emirali Şalverov.
Demek, aprel 15 künü alanda İçki ve İslâm Terek rayon taqımları körüşti. Oyunnıñ ilk daqqalarından İslâm Terek komandası ğalebe qazanmağa ıntılğanı körüne edi. Oyun ketişatında futbolcılar dülber paslar yapıp, öz qapılarını israrlıqnen qorçalap, birinci taym soñunda İçki komandasına bir gol kirsettiler. İçki taqımı da bayağı ustalıq kösterip, ekinci taymda raqip komandasına da bir gol kirsettiler. Neticede 1:1 esabınen oyun yekünlendi.
Soñra alanda Sudaq ve İslâm Terek rayon komandaları körüştiler. Biri biri artından eki oyun İslâm Terek komandasına ağır olsa kerek, çünki Sudaq komandası birinci taymda raqiplerge eki topnı kirsetti. Ekinci taymda İslâm Terek oyuncıları özlerini qolğa almağa tırışıp bir gol kirsetseler bile, oyun 2:1 esabınen yekünlendi ve böyleliknen Sudaq komandası ğalebe qazandı.
Final oyunı ise ğayet meraqlı oldı. Seyirciler oyun başlamasına köre, sudaqlılar ğalebe qazanacağına emin ediler. Amma İçki komandası aman aman ilk daqqalardan raqiplerini ucum etmege başladı. Sudaqlılarnıñ qapı bekçisi ğayet güzel oynağanına baqmadan, İçki komandası 4:0 esabınen ögge çıqtı.
Aprel 22 künü Aqmeçit stadionında Saq ve Kezlev komandaları körüştiler. Eki komandanıñ da oyuncıları öglerine ğalebe qazanmaq maqsadını qoyğanları belli edi. Amma bazı oyuncılarnıñ memnüniyetsiz, nezaret ve davaları sayesinde oyun bayağı uzandı. Birinci taymnıñ soñunda komandalar biri birine birer top kirsetip oldılar. Ekinci taymda ise saqlılar kezlev komandasını 2:1 esabınen ozıp oldılar.
Ekinci oyunda Aqmeçit ve Kezlev komandaları körüştiler. Birinci taymnıñ başı da soñu da olduqça meraqsız keçti. Amma ekinci taymda oyuncılar canlandı ve ilk topnı Kezlev komandası kirsetkenine baqmadan, Aqmeçit taqımı 2:1 esabınen ğalebe qazandı.
Böyle etip, finalda Saq ve Aqmeçit komandaları körüştiler. Birinci taym 0:0 neticesinen bitti. Ekinci taymda oyun deñişti. Saq oyuncıları biri biri artından raqiplerniñ qapılarına toplarnı kirsetmege başladılar ve neticede 3:0 esabınen ğalip çıqtılar.
QMC Yuqarı Şurasınıñ milletlerara munasebetler ve sürgün etilgen grajdanlar meseleri daimiy komissiyasınıñ reisi Remzi İlyasov öz çıqışında bu sene Meclis kubogına oyun tertibiniñ deñişmeleri aqqında aytıp, keçken oyunlar neticeleri ve İş gruppasınıñ planları aqqında haber berdi. ‘Yaqın zamanda Canköy, Yedi Quyu, Krasnoperekopsk ve Qarasuvbazarda oyunlar keçirilecek. Soñra ğalipler yarımfinal, final ve supermatç oyunlarında körüşecekler,’ — dep bildirdi Remzi İlyasov ve: ‘Biz trenerlernen qırımtatar futbol federatsiyasını teşkil etmege planlaştıramız, bundan da ğayrı, qırımtatar cıyma futbol komandasını şekillendirip, çeşit, şu cümleden çeteldeki oyunlarda iştirak etmege közde tutamız’ — dep qoştı.
Elmara Mustafayeva