Тюркиеде тюрк дюньясы маарифчилерининъ халкъара конференциясы кечти

11.05.20160:19

Апрель 23-26 куньлери Тюркиенинъ дюльбер туризм кошелеринден бири, чам тавларында ерлешкен ер тюбинден пышкъырып чыкъкъан сыджакъ термаль чокъракъларынен мешур Къызылджыхамам шеэринде Халкъара тасиль хадимлери "Авразия" федерациясынынъ невбетдеги конференциясы олып кечти.

Конференциянынъ ишинда Тюркие, Азербайджан, Булгъаристан, Косово, Шималий Къыбрыз, Къазахистан, Къырым, Романия, Иракъ ве Македония улькелеринде фаалиет косьтерген маариф хадимлери тешкилятларынынъ векиллери иштирак эттилер.

Къырымны Миллий Меджлис медениет ве тасиль идаресининъ ребери, "Маарифчи" бирлешмесининъ реиси Сафуре Каджаметова ве "Маарифчи" бирлешмесининъ идаре азасы Зуре Пинка темсиль эттилер.

Конференцияда тюрк дюньясынынъ маариф бирлешмелери темсильджилери ашгъыдаки меселелер боюнджа музакере эттилер:

— озь ара алякъаларнынъ шекилленмеси ёлунда конкрет чалышмалар;

 

— тюрк дюньясында мариф меселелериндеки интеграцияны пекитильмеси ве ортакъ макъсадларгъа иришильмеси;

— бу эмекдашлыкъ черчивесинде маарифте миллий усулларны бельгиев ве теджрибе пайлашув ве ил.

Конференцияда Халкъара тасиль хадимлери "Авразия" федерациясынынъ реиси Шуаип Озьджан ве федерациянынъ тефтиш комиссиясы реиси Яшар Янычарогълунынъ эсабат марузалары динъленильди.

Ачыкъ рей берюв нетиджесинде бу эки чокъ ишкир инсан федерациянынъ ве тефтиш комиссиясы башлыкълары оларакъ чалышмагъа векялети 2012-2016 йылларына тасдикъланды ве бу муддетке Халкъара тасиль хадимлери "Авразия" федерациясынынъ азалары тарафындан Декларация имзаланды.

Справка: "Авразия" тасиль хадимлерининъ федерациясы 2001 сенеси июнь 22-де Тюркие, Азербайджан, Къырым, Къазахистан, Къыргъызыстан маариф бирлешмелери тарафындан тешилятландырыльгъан эди ве иш бу улькелернинъ маарифчилери халкъара бирлешменинъ тесисчилери оларакъ ильк анълашманы имзалагъан эдилер. 2005 сенеси "Авразия" бирлешмеси ресмий Халкъара Ассоцияция оларакъ танылды, 2008 сенеси исе Халкъара федерация оларакъ статус алды.