Sükünet zamanlarına qaytuv, ya da ‘demokratiya’ yañı usulnen

11.05.20160:19

Aqmescit memurlarınıñ 2010 senesi 14 oktãbr №2899 tarihlı ‘Aqmescit şeer şurası icra komitetiniñ ‘ Aqmescitte kütleviy tedbirler keçirilmesi ve azırlanmasınıñ tertibi aqqında’ qararına deñişmeler kirsetilmesi aqqında’ qararı ceьiyetimizde ‘demokratiya’ añlamı aqqında tüşüncege daldırdı. Aslı da bu añlamnıñ esas manaları fikir ve söz serbestligi olması kerek. Amma Aqmescit icra komitetiniñ mezkür yañı qararı şaşıttıra. Ya da sade insanlar, ya da memurlarımız ‘demokratiya’ sözüni yañlış añlaylar, çünki mezkür qarar haqsız ve vatandaşlarnıñ barışıq merasimlerni keçirmek haqqına qarşı çıqa. Aqmescitte kütleviy tedbirler keçirilmesi aqqında qarar merasimni teşkil eticilerni iştirakçilerni strahovkasnı temin etmege mecbur ete, tedbirlerniñ keçirüv yerlerini sıñırlay, yaşlarnıñ resmiy qayd olunmağan teşebbüslerniñ faaliyetlerine yollarını kestire.

Amma, meraqlısı şunda ki, cemaatçılıq bu yañılıqqa tek yaqında qarşılıq köstermege başladı. Böyle etip, 22-25 noyabr künleri kütleviy tedbirler keçirilmesi aqqında qararına tüzetüvler kirsetmek teklifi ile Aqmescit başı V.Ageyevge muracaatına imzalar toplanıldı.25 noyabrde keçirilgen matbuat konferentsıyasında icra komitetiniñ vekline qırım faaliyetçileriniñ imzalarını bulundırğan muracaat teslim etildi. İmzalarnı ‘Aqmescit Merkeziy rayonınıñ yaşlar komiteti’ toplay.

Qırımtatar teşkilãtlarına kelgende, olarnıñ mevamı şimdilik faal sayılmaz. Teşkilãtlarnıñ birinde ‘Biz mitingler keçirmeymiz, onıñ içün bu qarar faaliyetimizge pek keder etmez’ dep bildirdiler. Qırımtatar yaşlar merkezi ise bu meseleden çette qalmaycaq. Mezkür teşkilãt azalarınıñ aytqanlarına köre, bu qanun leyhası Ukraina Yuqarı Şurasına teslim etilgende, Qırımtatar yaşlar merkezine diger Ukrain teşkilãtlar bu qanunğa qarşı narazılıq aktsiyalarnı keçirmekni teklif ettiler. Amma yañı qanunnı qabul etüv esnası biraz toqtalğanı sebebinden aktsiyalar keçirilmedi.

 

Belli olğanı kibi, muracaatnı ‘Yaşlar sedası’ teşebbüs gruppasından ğayrı diger qırımtatar teşkilãtlarnıñ vekilleri imzalamadılar. ‘Bugün qırımtatar teşkilãtları aktsiyalarnı belki de keçirmeyler, amma kelecekte, bu qarar qabul olunsa, böyle imkãn aslı da olmaz. Misal olaraq, milliy bayraq bayramını hatırlayıq. Qarar qabul olunsa böyle kibi tedbirlerni keçirmek içün teşkilãtçılar ögünde bir sıra problemalar çıqacaq. Onıñ içün artıq şimdi biz çette qalmayıp, kelecekte serbestligimizni temin etmek içün fikirimizni bildirmelimiz.’-dep qayd etti Aliye Kefileva, ‘Yaşlar sedası’ teşebbüs gruppasınıñ azası.

Cemaat teşkilãtları, teşebbüs gruppalarnıñ asıl maqsadı- cemiyetniñ yaşayışını deñiştirmek, memurlar, akimiyetiniñ areketlerini kerek yönelişlerge doğrultmaq. Onıñ içün haqlarımıznı sıñırlağan böyle kibi meseleleriniñ çezilmesinde çette qalmamalımız. Yoqsa, akimiyetke qarşı bir söz aytmaq çette tursın, bunı aqlına bile ketirmek yasaq olğan sovet devirlerine qayta bilirmiz.

Azize Abla