Aqmescit rayonındaki Saraylı Qıyat köyüniñ qırımtatarları «Rus Bloku» firqasınıñ Qırım bölüginiñ yolçaşçısı, Qırım parlamentiniñ deputatı Oleg Rodivilovnıñ adına köyde milletlerara davanı qozğatqanı içün militsiyağa ariza yazdılar. Bu aqta ‘Avdet’ke köy sakinleri ikâye ettiler.
Arizanıñ müellifleri, Rodivilov köyniñ çeşit merasimlerinde bulunır eken, qırımtatarlar aqqında menfiy sözler ayta ve tamır halqnıñ vekillerine topraq ayırmasına qarşı çıqa edi dep tasdiq eteler.
Yaqında köyde ötkerilgen toplaşuvda militsıya berilgen arizanı cevapsız qaldırğanları belli oldı. Bundan da ğayrı, toplaşuvda iştirak etken qırım militsiyasınıñ vekili, özüni taqdim etmeden, körüşüvniñ ketişatına keder ete ve ‘Qırım’ devlet teleradiokompaniyasınıñ hadimlerini quvmağa tırıştı.
İsmet Arif