Bütündünya qırımtatar kongressiniñ prezidenti, Qırımtatar Milly Meclis Reisiniñ birinci muavini Refat Çubarov iyül 19 künü yaqında vazifege kirgeninden soñ birinci kere Qırımnı ziyaret etken Odessada Türkiye Cumhuriyetiniñ Baş konsulı Hüseyin Ergani ile körüşti.
Aqmescitte oolıp keçken körüşüv devamında Refat Çubarov ve Hüseyin Ergani qırımtatar halqınıñ zemaneviy vaziyetini muzakere ettiler.
Refat Çubarov konsulğa Aqmescitteki Büyük Cuma Cami qurucılığı boyunca azırlıq işlerniñ ketişatı aqqında haber berdi.
Hüseyin Ergani qayd etti ki, Baş konsul vazifesinde Qırımğa ziyaretine azırlanaraq, cemiyet ve akimiyet arasında munasebetlerni aks etken KİV’nıñ haberlerine ayrıca diqqat etti. “Maña belli olğanı qadar, — qoştı Ergani, — soñki vaqıt Qırımda içtimaiy-siyasiy esnaslarnıñ faal iştirakçileri arasında dialog qurula, bu, ebet, meseleler çezilüvi içün kerekli şarttır”.
Refat Çubarov Ukraina ve Türkiye arasında dialognıñ keñişlenmesi mevzusını devam eterek, baş konsulnıñ diqqatını “Qırım akmiyetiniñ Qırımnıñ iqtisadiy inkişafı saasında maqsadlarğa irişmek niyetiniñ ciddiyligini farqlı leyhalarda iştirak etmek içün çetel investorlarnıñ celp etilmesi”ne celp etti ve sübetdeşine Türkiye ve Qırım arasındaki munasebetleriniñ inkişafına yardım etmege teklif etti.
Körüşüvniñ soñunda Çubarov Odessada Türkiye Cumhuriyetiniñ Baş konsulı Hüseyin Erganige Qırım inkişafı suallerine ve qırımtatar halqınıñ meselelerine diqqatı ve merağı içün teşekkür bildirdi.