Bahçisarayda Mustafa Cemilev İsveçre Elçisi Stefan Gullgren ile körüşti

11.05.20160:19

Bahçisarayda Mustafa Cemilev İsveçre Elçisi Stefan Gullgren ile körüşti

2010 senesi 30 sentâbr künü Bahçisarayda Qırımtatar Milliy Meclis Reisi, Ukraina halq deputatı Mustafa Cemilev Ukrainada İsveçreniñ Fevqulâde ve Murahhas Elçisi Stefan Gullgrenni ve refiqası Alla Logovanı qabul etti.

Körüşüvde Bahçisaray rayon memuriyetiniñ yolbaşçısı İlmi Umerov, Bahçisaray regional meclisniñ reisi, Qırımtatar Milliy Meclis Reisiniñ muavini Ahtem Çiygöz ve Meclisniñ tış munasebetler bölüginiñ yolbaşçısı Ali Hamzin de iştirak ettiler.

Han sarayını ziyaret etken soñ, qıymetli musafirler şerefine ziyafet berildi, onıñ devamında Ukrainadaki olğan siyasiy vaziyetinen, olacaq yerli akimiyet qurumlarına saylavlar ve bu qurumlarda qırımtatarlarnıñ temsilciligi perspektivasınen bağlı sualler boyunca fikirler deñişüvi olıp keçti.

 

İsveçre Elçisi Stefan Gullgren qayd etti ki, onıñ Qırımnı faal ziyaret etkeniñ maqsadı – QMC’deki içtimaiy-siyasiy vaziyetniñ ve yarımadada yaşağan halqlarnıñ tarihınıñ daa da teren ögrenilmesidir. “Belli olğanı kibi, ağımdaki seneniñ aprel ayında Qırımnı İsveçre Qırallığınıñ tış işler naziri Karl Bildt ziyaret etti, — devam etti diplomat, — ve, öz ziyareti devamında, Qırım siyasetçiliginiñ temsilcileri ile çoq körüşüvler keçirdi, şu cümlede Qırımtatar Milliy Meclisniñ yolbaşçılığı ile”.

Belli olğanı kibi, İsveçre ükümeti, İsveçre halqara inkişaf ve işbirlik agentligi SİDA vastası ile Qırımda BMT İnkişaf programması leyhalarınıñ ömürge keçirilüvinde iştirak etip, ileride de Qırımnıñ iqtisadiy ve içtimaiy inkişafına yardımcı olmaq niyetindedir.

Bu munasebet ile, qayd etti İsveçre diplomatı, qırımtatar halqı temsilcilerniñ halqara teşkilâtlar ve Ukrainada bulunğan diplomatik missiyalar ile daimiy ve sistemli dalogları pek müimdir. “Muntazam sürette keçirilgen körüşüvler fikirlernen paylaşmaq ve Qırım halqları yaşayışlarınıñ farqlı saalarındaki yañı leyhalarnı ögrenmege imkân bere”, — dedi diplomat.

Körüşüvniñ soñunda Ukrainada İsveçre Elçisi Qırımtatar Milliy Meclis Reisini oña kelişken vaqıtta, eki taraflama menfatlarğa dair suallerni ileride muzakere etmek içün, Kiyevdeki İsveçre Elçiligini ziyaret etmege davet etti.

Qırımtatar Milliy Meclisniñ Matbuat hızmeti