C.Kömürci “Vesenniye golosa” yaş bayancı ve akkordeoncılar konkursınıñ laureatı oldı

11.05.20160:19

Bahçisaraydan 13 yaşındaki Cemil Kömürci II yerni qazanıp, III Moskva Halqara “Vesenniye golosa” (“Baar sesleri”) yaş bayancı ve akkordeoncılar konkursında 12-14 yaş gruppasında Laureat oldı.

26 mart – 2 aprel künleri Moskvada ötkerilgen konkursta Kazahstandan, İsveçreden, Belorusiyadan, Rusiyeden ve Pribaltika ülkelerinden 80’den ziyade muzıkant iştirak etti. Jüri azaları – Rusiye halq artisti, professor, Gnesinler adına Rusiye muzıka Akademiyasınıñ kafedra müdiri Fridrih Lips reisliginde Rusiye ve sabıq Sovetler ülkelerinden belli ocalar ve icracılar.

“Avdet” gazetasına genç muzıkantnıñ babası – Qırım müendislik ve pedagogika universitetiniñ sanatlar fakultetiniñ uyken ocası Rustem Kömürci haber etkeni kibi, konkurs pek yüksek seviyede olıp, üç yılda bir kere keçirile. “Moskva bayan-akkordeon icra sanatınıñ dünya merkezi sayıla. Onıñ içün bu konkursta iştirak ve ğalebe er muzıkant içün pek müimdir. Bizim içün bu, öz seviyemizni sınamaq, başqa işitrakçilernen öz icadiy potentsialımıznı ve icadiy imkânımıznı teñeştirmek imkânı edi”, — tarif ete Rustem Kömürci.

Onadan da ğayrı, Cemil Moskva ve Sankt-Peterburgdaki muzıka oquv yurtlarına kirmek içün ağzaviy davetname aldı, em de Bulğariyada folklor muzıkası festivalinde iştirak etmek içün davet etildi.

Hatırlatayıq, genç muzıkant keçken seneniñ oktâbr ayında Triyest şeerinde (İtaliya) “FİSA…. ARMONİE” VIII halqara konkursında Gran-pri, keçken seneniñ mayıs ayında Drogobıç şeerinde olıp keçken “Viçnıy ruh” halqara konkursında Gran-pri alğan edi, em de çoqtan-çoq cumhuriyet ve bütünukraina konkurslarınıñ ğalibi olğan edi.

Elmara Mustafayeva