Siluan papazdan olarnı qorçalamağa rica eteler

11.05.20160:19

 

Bahçisaray şeeriniñ iş adamları gruppası şeer akimiyetine, mahkeme organlarına, Qırım dinciligine, qırımlılarğa Bahçisaraydaki Svâto-uspen monastırnıñ papazı Siluannıñ “duşman ve uquqsız areketlerinden” olarnı qurtarmaq ricasınen muracaat ettiler.

Bahçisaray iş adamları öz muracaatlarında qayd etkenleri kibi, olar şeer şurasınıñ izini ile endi 10 yıl devamında belli Zıncırlı-medrese, Çufut-kale ve Svâto-uspen monastırge alıp barğan yol boyunca suvenirler satıcılığınen oğraşalar. “2005 senesinden Siluan papazınıñ qabaatı sebebinden qolaysız bir vaziyet devam ete. O, din adamı olğanına baqmadan, monastır sıñırlarını ve öz ticaretini keñişletmek maqsadınen, bizge, iş adamlarına, qarşı cenkni alıp bara”, — aytıla muracaatta. İş adamlarınıñ malümatına köre, papaz, öz vazifesinen ve Bahçisaray şeeriniñ sabıq yolbaşçısı Viktor Kurbatov ile dost munasebetlerinen faydalanıp, olarnıñ satıcılıq meydanıñ sıñırlarını bozıp, onıñ arendası aqqında bir de bir vesiqlarnı aldı, ondan soñ satıcılarnıñ yerlerini almağa talap etip, olarnıñ işişne keder etmege başaldı.

“Biz sayamız ki, Siluan papaz böyle etip bizge qarşı öz duşmanlığını köstere ve din qanunlarına qulaq asmay, — qayd eteler iş adamalrı. —  Onıñ faaliyetinden körüne ki, insanlar, oña köre, tek fayda içün kerekler, ögretmek, din yoluna qoymaq içün degil”. Ondan da ğayrı, muracaat müellifleri bildirgenlerine köre, papz Ukraina qanuncılığını da boza. “Meselâ, onıñ satqan mahsulatı – tuz, suv, bal, şarap – SESte teşkerilmey, bu ise turistlerniñ sağlıqları içün havflıdır”, — deyler iş adamları. Olarnıñ malümatlarına köre, monastır yanındaki soqaqlarda yaşağan eali de Siluannıñ işine qarşı çıqa, çünki o, “öz ticaret faaliyetinen şeerni kirlete, saniter qaidelerine boysunmay, onıñ territoriyasında ayaqyollar ve çöplük qutuları yoq”.

İş adamlarınıñ özleri, aksine, şeerge fayda ketirmege tırışqanlarını aytalar: büdjetke para bereler, öz paralarına yerlerini abadanlaştıralar, çöplükni toplap, çıqaralar. Öz aqlarını qorumaq içün, monastır ile mahkemeleşeler, ve endi Aqmescit, Aqyar ve Kiyev mahkemelerinde ğalebe qazandılar, bu mahkemeler papaznıñ areketlerini qanunsız olaraq qabul ettiler, amma o, mahkeme qararlarına qulaq asmamağa devam ete.

 

 

 

OBKOM