Bismillãhirrahmanirrahim
Qırım müsülmanlarınıñ temsili olur eken, yarımada müsülmanlarınıñ isteklerini yerine ketirir eken, Qırım Müsülmanları diniy idaresi Qırım sakinleri ve ayrıca da müsülmanlarına diniy sektalarnıñ tesirine muqavemeti boyunca ‘İslah’ programmasınıñ meydanğa ketirilmesi aqqında ilãn ete.
Çeşit diniy sektalarnıñ faaliyetine effektiv qarşılıq köstermek ve Qırımda diniy teşkilãtlarınıñ menfiy tesiri ve faaliyeti aqqında malümatlarnı bir sistemağa ketirmek maqsadınen QMDİ bu yönelişte yapılğan işni mahsus programmağa ayırmağa qarar berdi.
Diniy dolandırıcılarnıñ faaliyetine dair Ukraina ve Qırım siyasetçileriniñ yüksek laflarına, matbuat ve cemaatçılığınıñ canlı iştiragına baqmadan, Ukraina ve Qırımda sektalarnıñ faaliyetini yasaq etüvi boyunca kerçek adımlar yapılmağan.
Qırım müsülmanlarınıñ menfaatlarını qorçalağan QMDİ bütün bu vaqıt içersinde sektalar tarafından küçlü basqınen yüz -yüzge qarşılaşa edi. Diniy muhtekirler ise devlet strukturaları tarafından qarşı areketlerge rastkelmeyip, atta aksine, bazı memurlarnıñ qoltutuvını körip, resmiyleştirilgen cemiyet, neşir ve atta diniy idareler seviyesine çıqalar. Bu yerde ukrain ve qırım memurlarınıñ eki taraflı standartları aqqında söz yürsetile: bir taraftan olar, ekstremistlerni tekbih ete, diger taraftan ise öz faaliyetsizligi, ya da belli areketlerinen olarğa qoltutalar. Böyle etip, Aqmescitte ‘Adet’, ‘Davet’, ‘Azamat’, ‘İman’ kibi, Kezlevde ‘Minaret’, Bağçasarayda ‘Eski yürt’ kibi teşkilãtlar, ‘Vozrojdenye’ (‘Tiklenüv’), ‘Minaret’, ‘Miras’ kibi neşirler, ‘Vilayat Qırım’, ‘Vozrojdeniye’, ‘Hizb-ut Tahrir’ kibi internet saytlar meydanğa ketirildi. Mezkür cemiyet, neşir, saytlarnıñ peyda olmasına QMDİ-nıñ narazılığına qarşılıq olaraq, memurlar bilmemezlikke ura, bazıda ise neşirler arqalı böyle kibi sektalarnıñ zararsızlığı, ya da faydasını tasdiqlaylar.
Sekta vekilleri, özleri devlet organlarına qarşı açqan mahkeme işlerinde iştirak eteler. Bir baqqanda eyi maqsat ile çıqqan sektacılar öyle de maqtanılacaq kibi vaziyette bulunmağan müsülmanlarnıñ vaziyetini daa beter fenalaştıra, özlerini teşvik etmekteler.
Diger taraftan, sektalarnıñ menfiy tesirine qarşı müsülmanlarnıñ artqan narazılıqları fonunda islam saflığı oğrunda küreşkeni kibi özlerini tanıtqan Ukrainada ‘Ukraina Müsülmanları diniy idaresi ile taqdim etilgen ‘Habaşi’ler de öz faaliyetini köstermekteler. Bu teşkilãtnıñ hayriye maqsatları artında Qırım müsülmanları diniy idaresini dağıtmaq ve öz ‘Şarq’ bölügini qurmaq niyetleri turmaqta.
Añılğan sektalarnı birleştirgen bir maqsat- qırımtatar halqını bölmek ve Qırımda qalabalıq doğurmaqtır.
Büyüklerini ürmet etmegen, adetlerini saymağan oğullar artıq sıq- sıq rast kelmekte. Sektalarğa kirgen yaşlarnıñ ana-babaları, öz balalarını manqurtlıqtan qurtarıp olamaylar. Evlãdları ana-babasını diñlemegeninden qorantalarda sağlam mühit bozula, yürekler qırıla.
Bir vaqıtları Qırımğa qaytmaq ve tamır halq olaraq öz haqlarını tiklemek muqaddes maqsat bir dünya islam Devleti- Halifatnı qurmaq, dünya kapitalizm ve demokratiyanen küreşmek kibi masal ğayesinen deñiştirile. Bizim qartlarımız, Qırımğa qaytmaq içün öz küçlerini ve hayatlarını olarnıñ torunları çetel muhtekirlerniñ eline tüşmesi içün sarf ettilermi? Halqımız ğurbetlikte Vatanına qaytmaq hayalı ile soñra vatanperverlik ğayeleri, Qırım ve qırımtatarlarğa ait olğanından ğurur ve sevgi duyğuları kufur dep sayılğanı içün çekiştimi? Daa yaqın zamanda bizim balalarımız öz dede- babalarını nefret ete, qırımtatarlarğa ‘kãfirler’ dey,davalaşqanını köz ögümizge bile ketirip olamaz edik.
Diniy cehetten bölünmek- halqımzınıñ kelcegi içün eñ büyük telükedir. Sektalarnıñ menfiy faaliyeti tek bir halqımıznen sıñırlanmay; Qırımnıñ müsülman olmağan ealisi de gizli islam manasını taşığan siyasiy oyunlarda iştirak etmekte. Bazı rüsiyeci küçler islamnen bağlı er bir şeyge nefret ve qorqu doğurtalar.
Olğan vaziyetini qısqadan tarif eterek, Programmanıñ manasına qaytamız. Yuqarıda aytqanımız kibi, QMDİ müsülmanlarğa ve qırımtatarlarğa yat usul ve maqsatlarnı kirsetken sektalarnıñ faaliyetine qarşılıq kösterüvde ilk saflarda buluna. QMDİ-nıñ imamları basqığa oğratıla, camilerden çıqarıla.
Devlet organları Qırım müsülmanları, qırımtatarlarınıñ meselelerine lãqaydlıqnen baqalar, onıñ içün QMDİ Programmanı amelge keçirmek içün Qırım ealisi ve ayrıca qırımtatar halqına destek ve yardım içün muracaat etmege qarar aldı.
Yuqarıda aytqanımız kibi, Programmanıñ maqsatlarından biri- Qırımda islam sektalarınıñ faaliyeti aqqında malümatlarnı bir sistemağa ketirmektir. Yaşlarımıznıñ sektalarğa kirüv yolunı kestirmek içün, QMDİ usulları,maliye menbaları, bazı ayrı çetel şahıslar aqqında malümat toplamaq kerek. Elde etilgen malümatlar esasında sektalarnıñ faaliyetine qarşılıq effektiv mehanizm işlenilecek.
QMDİ barışıqta yaşamağa istegen Qırımnıñ bütün müsülmanlarına İslamnen pis maqsatlar içün qullanğan diniy meyilli ekstremizstlerniñ tesirini yoq etmek içün ğayretler köstermeleri ricası ile muracaat ete.
Rica etemiz:
Sektalarnıñ faaliyetinen bağlı özüñiz rast kelgen malümatlarnı QMDİne teslim etmek.
Alınğan malümatnıñ işletüv şekli teslim etkenniñ yazılı şekilde razılığı ile er bir konkret vaziyette muzakere etilecek.
Украина, АР Крым
г. Симферополь
ул. Курчатова, 4.
Тел/факс:
+38(0652)27-43-53
e-mail: muftiyat@qirimmuftiyat.org.ua
www.qirimmuftiyat.org.ua