Bu künleri Qırımnıñ er bir köşesinde Sovetler Birliginiñ eki defa qaramanı, dünyaca meşür uçucı –sınavcısı Amet-Han Sultannıñ 90 yıllığını qayd etüv çerçivesinde qaraman aqqında hatıranı yaş nesilge saqlamaq ve yetkizmek maqsadınen çeşit merasimler ötkerile.
Keçken bazar künü faal yaşlar tarafından efsaneviy uçucı- sınavcınıñ yeñişlerine cemaatçılığınıñ diqqatını çekmek ve ‘Aqmescit’ Halqara aeroportına Amet-Han Sultannıñ adını bermek teşebbüsine qoltutmaq içün ‘Amet Han Sultan hatırasına avtoyürüş’ aktsıyasını kerçekleştirildi.
Merasimni ‘Qırımtatar vetanperver gruppası’ ve ‘Mecal’ teşebbüs gruppaları teşkil ettiler. Avtoyürüşte 40 yaqın maşna iştirak etti. İştirakçiler yürüşni Kezlev şossesinden başlap ‘Aqmescit’ halqara aeroportı yanından, Aqmescitniñ merkeziy soqaqlarından keçip, Bağçasarayğa yol aldılar. Mında ‘Aqmescit’ halqara aeroportına Amet- Han Sultannıñ adını bermek ğayesine qoltutqan vatandaşlarnıñ imzaları ilk sefer toplanıldı. Kolonna Bağçasaraydan Şülü(Ternovka), Baydar(Orlinoye), Foros, Simeiz köylerinden Alupkada qaramannıñ eykeli yanında toqtadı. Bu yerde miting keçirildi.
Avtoyürüş Alupka- Yalta- Aqmescit marşrutı boyunca Tavriya Milliy Üniversitetiniñ rahatlıq bağçasında tiklenilgen sürgünlik qurbanlarına abide yanında yekünlendi.
Foto- Zarema Yalıböylü.