Bu sene fevral ayında QMDİ Yuqarı şurası Ukraina akimiyetiniñ çeşit aqıntılarına ayrı devlet memurlarınıñ qırım müsülmanlarını bölmek ğayretlerini kestirmek talabı ile muracaat etti. Mezkür memurlar Qırım Müftiyatına paraller olaraq, liderleri habaşıtlerden olğan, Qırım müsülmanlarınıñ diniy merkezini resmiyleştirdiler.
Birinci muracaat yollanılğanından 4 ay keçti. Bu devir içersinde QMDİ-niñ Kezlev şeerinde belli olmağan şahıslarnı haqsız defn etken, cami territoriyasında izinsiz qurucılıqnı başlağanlarnı mesüliyetlikke çağırmaq talabı ile bir qaç muracaat yollanılğan edi. Yüz bergen cinayetlerniñ qabaatlılarnı açıqtan bildirdik- Veliyev Ridvan- habaşizmnıñ tarafdarı ve onıñ ocası ‘Ukraina müftisi’- Ahmad Tamim. Saq ve Kezlev yerli organlarınıñ mesüliyetlikni biri -birine yüklegenlerinden ğayrı ellerinden bir şey kelmedi.
Ceza almaqnıñ yerine biz TV ekranlarında bu cinayetlerni teşkil etkenlerni tebessümnen intervyu bergenlerini, öz araştrımalarını keçirmege söz bergenlerini köremiz. Demek ki, Kezlev organları cinayetlerni keşf etilmesini cinayetçilerniñ özlerine avale ettiler.
Amma ertemi, keçmi, er şey ortağa çıqar. Onıñ içün cinayetlerge qoltutqan Kezlev militsiya hadimleri ukrain qanuncılığı çerçivesinde mıtlaq ceza alırlar dep şübesiz ayta bilemiz.
Biz QMDİ Yuqarı Şurasınıñ azaları Ukraina devlet akimiyetinden talap etemiz:
1. Ukraina Yuqarı şurasınıñ yanında Kezlev şeeri, İsmail-bey köyüniñ etrafında çetel muacirlerniñ kütleviy şekilde defn etilmesiniñ araştırılması boyunca tetqiq komissiyasını meydanğa ketirmek.
2. Kezlev militsiya bölüginiñ hadimlerini, milletlerara munasebetler bölügini mesülyetlikke celp etmek ve faaliyetini nezaret etmek.
3. Kezlev şeerinde yerli mezarlıqta haqsız defn etilgen şahıslarınıñ vefat sebeplerini araştırmaq.
QMDİ-niñ Yuqarı Şurası