Dünyanı dülberlik, halqnı ise istidatlı insanlar qurtaracaq
‘Vay, o qız X- faktorda iştirak etken edi!’ ibaresi onı soqaqta tanıylarmı degen adetiy sualimniñ aldını aldı. Aziza bu sözlerge külümsirep, masanıñ yanına yaqınlaştı. Onı tanığanlarına endi alışqan edi.
Aziza İbragimova daa bala olğan vaqıtta özüne icadiy kelecegini sayladı: balalıqtan ömrüni sanat ile baylamağa hayal ete edi. İşte bu sebepten de 16 yaşında olur eken tuvğan Kezlevden uzaq Harkovğa teatr aliy oquv yurtlarında birinde aktörlıq sanatını menimsemege ketti.
Er şey nasıl başlandı?
2010 senesi. Bütün Ukrainağa yañı X- Faktor adlı vokal şousı ğayet meşür oldı. İgor Kondratük şouda iştirak etmek içün istidatlı icracılarnı saylay edi. Aziza böyle kibi yarışlarda öz küçüni sınap baqmağa istey edi. Yır sanatına ögrenmegen Aziza kene de bazı mearetlerge saip edi, onıñ göñlü yırlay edi.
İşte oktãbr ayında kiyev sanasında seyirciler ve juri azaları alçaq böylü, cazibeli, sıcaqgöñlü qıznı kördiler. Onıñ tış qıyafeti er kesni biraz ayrette qaldırdı ve meraq doğurdı. Aziza çukot kiyiminde, qolunda çukot muzıka aleti ile edi. Çukçalarğa mensüp özgün icracılıq üslübi qıznıñ sesine pek uyğun kele edi.
Ne içün aynı çukot yırı, aceba? Soñra añlaşılğanı kibi, Aziza bu yırnı birinci kere üniversitette teatr spektaklinde icra etti. Bu yırnı pek güzel yırlağanı içün rejissör aynı bu yırnen juri ögünde çıqışta bulunmağa tevsiye etken edi.
‘Sevgi keldi..’ yırını 80 ss. Roza Rımbayeva yırlay edi. Aziza İbragimova bu yırğa ekinci ömür bağışladı. Seyirciler ve juri yaş icracınıñ ustalığına yüksek qıymet kesip, onı nevbetteki turğa keçirdiler. Böyle etip, Aziza bu muzıka şounıñ 24 eñ istidatlı icracılar sırasına kirdi.
‘Men kastingten keçkenime pek quvandım, çünki 3 biñ istegenlerden biri edim. Ve ebette, ilerige ketmegenime biraz kederlendim. Amma bu tecribe menim içün pek qıymetlidir. ‘X-Faktor’ sayesinde menim yañı imkãnlarım, yahşı tanışlarım peyda oldı.’
‘Er alda, men keçseydim, sevgen bir çoq şeylerden red etmege kerek edi: oquv, bizim üniversitet teatri, evge siyrek barar edi. Er alda er şeyniñ bir hayırlı tarafı bar.’
Kino hayatı
‘X-Faktor’dan soñ belli ukrain aktöri ve rejissör Viktor Andriyenko Azizağa ‘Kumovskiye bayki’ filmnde esas rollerinden birini teklif etti. Seriyalardan birisi endi Birinci milliy kanalda kösterilgen edi.
Eñ baştan film 4 telenovelladan ibaret olmalı edi. Neticede ise daa 20 seriyasını yazmağa qarar berdiler. Olarnı yazda çıqaracaqlar. Filmde biri birinen dostlaşqan eki qoranta aqqında tarif etile: rus ve ukrain qorantaları. Aziza ukrain qorantasında Babiyniñ qızını oynay.
‘Filmde rolge yazuvları pek meraqlı edi,- hatırlay Aziza,- men facialı monolognı oquy edim, amma aslı komediya filminde çıqmaq kerek edim.’
‘Kinoğa çıqmaq-menim içün yañı bir şey, men özümni tek sınap baqam. Dostlarım mende yahşı çıqa dep aytalar. Men yañı bir şeylerni ögrenmege sevem, elimden kelse de pek quvanam. Men animatsıya teatri kafedrasında oquyım- bu qoqla teatri, kölge teatri. Harkovde bizim öz oquv teatrimiz bar.’-ikãye ete Aziza.
Tuvğan şeyler aqqında sevgi ile.
Qırımdan tış yerlerde yaşağan qırımtatarlarnıñ eki çeşiti bar: öz tamırlarını, milletini, dinini unutqanlar ve tuvğan yerleri, evlerinden çeşit sebeplerden ketip, milliy añları daa yüksek olğanlardır. Aziza öz milletinden utanmay, özüni qırımtatar olaraq tanıta. Amma kexlev gimnaziyasında oquv ana tilini ögrenmege imkãn qaldırmadı. Aziza qırımtatar tilini özü ögrengen ve bayağı muvafaqıyetlerge irişken tatasından örnek ala. Azizanıñ aytqanına köre, ana tilini ögrenmege halq yırları pek yardım ete. ‘Er bir yırnı men göñlümden keçirmege, hususan bita-qarbabalarımız yırlağan türkülerni ise duymağa tırışam.’ Şimdi Aziza yırcı Emine Emir-Aliden vokal derslerini ala. Onıñ qırımtatar yırlarını ögrenmege istegi büyüktir. Belki olarnıñ yardımınen o muzıkada öz üslübini tapıp olur. Harkovdaki kastingte Aziza qırımtatar yırından başlacaq edi.Amma Kondratük manasını añlağan yırnı diñlemege istegen edi. Onıñ içün Aziza başta "I feel good" (Ceym Braun), ‘Sevgi- tılsımlı diyar’ ( ‘Jestokiy roman’ kinofilmden yır) ve soñunda da nasıl olsa da qırımtatar yırını diñlemege qandırıp, sevgili yırlarından ‘Araba qapu’ türküsini icra etti.
‘Men qırımtatar eski yırlarını çoqça ögrenmege isteyim. Belki olarnı biraz deñiştirip, başqa üslüplerde yırlap baqarım.’- dep, yaş yırcı planlarınen paylaşa.
Aziza Maykl Ceksonnı icadiy örnek olaraq saya.
Aziza şimdi tek ögrene, oquy, amma planları büyük. Bu planlarında ise esas rolüni ise bir maqsat tuta: ana-babasınıñ ğururı olmaqtır.
Azıze Abla azırladı
Mutehassınıñ tevsiyeleri:
Qırımtatar tilinde yırlamaq, yırnıñ manası aqqında tüşünmek tilni menimsemege yardım ete. Yırlañız ve ana tilini ögreniñiz.
Araba qapı
Araba qapı, aralıq, aman,
Ne baqarsıñ, analıq?
Menim yarem mında yoqtır,
Dünya maña qaranlıq.
Ateşim var, külüm yoq, aman,
Bülbül oldım, tilim yoq.
Bu yalan dünya üstünde
Ah çekmegen künüm yoqtır.
Bir ah çektim terenden, aman,
Dağlar köçti yerinden,
Men ah çekmey, kimler çeksin,
Ketti yarem elimden.
Çıqtım yüksek qırlara, aman,
Baqtım uzaq yollara.
Bekley-bekley men usandım,
Kelmediñ bu yaqlara.
Qar yağar alçaqlara, aman,
Sarılır saçaqlara.
Meni yardan ayırdılar,
Saplansın pıçaqlara.