Dekabr 15 künü Kiyev şeerinde Ukraina Tasil ve ilim nazirliginiñ Kollegiyalar zalında Ukraina Tasil ve ilim nazirligi yanında milliy azlıqlar bütünukrain cemaat teşkilãtları tasil programmaları yolbaşçılarınıñ cemaat Keñeşiniñ üçünci toplaşuvı olıp keçti.
Keñeş toplaşuvınıñ kün tertibinde:
-Ukrianada türkiy tilli halqlar(gagauz, qırımtatar, urum, karaim, qırımçaq) medeniyeti ve tasili meselesi çeziminiñ problemleri ve istiqballeri;
-Ukrainada milliy azlıqlar tillerinde tasilniñ dersliklernen teminlenüv vaziyeti kibi meseleler baqıldı.
Mezkür Tedbirde Milliy Meclis medeniyet ve tasil idaresiniñ başı, qırımtatar tasil hadimleri ‘Maarifçi’ birleşmesiniñ reisi Safure Kacametova da aza olaraq iştirak etti. Qırımtatar maarifiniñ vekili kün tertibinde çıqarılğan meseleler boyunca sözge çıqıp, Qırımda qırımtatar tilinde tasil meseleleriniñ bugünki vaziyetini, şu cümleden, milliy mektepler ve sınıflarnıñ dersliklernen teminlenüvi, Ukraina tasil sistemasında qırımtatar tilinde tasilniñ amelge keçirilüv meselesi ve, umumen, qırımtatar medeniyeti ve tasil meseleleriniñ aqqında ayttı. Qırım maarifçileriniñ yolbaşçısı Safure Kacametova 2006 senesi dekabr 24-te IV Qırımtatar Qurultayınıñ 5 sessiyasında qabul olunğan Qırımda qırımtatar tilinde tasil Kontseptsıyası (muelliflerden biri- Safure Kacametova), nihayet, 18 yıllıq davadan soñ, 2010 senesi oktãbr 20-de Qırım Yuqarı Şurasınıñ sessiyasında tasdiqlanğanını beyan eterek, mezkür Kontseptsiya ömürge keçirilmesi içün devlet onı em qanuncılıq, em de maddiy cehetten teminlemek zarurlığını qayd etti.
Bu toplaşuvnıñ iştirakçileri Qırımda qabul olunğan ‘Qırımtatar tilinde tasil Kontseptsıyası’na meraq bildirip, qırımtatar maarifiniñ bu saada yapqan işine yüksek qıymet kestiler. Onı da qayd etmeli ki, bu toplaşuvda Safure Kacametova Ukraina Tasil ve ilim nazirligi yanında milliy azlıqlar bütünukrain cemaat teşkilãtları tasil programmaları yolbaşçılarınıñ cemaat Keñeşiniñ reisi A. İ. Monastırskiyniñ muavini olaraq saylandı.
Milliy Meclis Matbuat hızmeti