Öz medeniyetine sevgi ile

11.05.20160:19

Er insannıñ ayatında urba er vaqıt müim yerlerinden birini ala edi ve alacaq, urba yardımınen er insan qusurını saqlap, dülber taraflarını, individualligini köstere bile…

İnsan öz tışqı körünişini özü seçe. Onıñ esas vazifesi – özüni qorçalamaq degil de, yaraştırmaqtır. Ve, adet üzre, buña dülber kiyim ile irişilir. Dülber urba – insanğa kelişken, oña uyğun kelgen, işine, içtimaiy vaziyetine, keyfine, yaşına köre olğan kiyimdir. Amma urba üslübi daima deñişe, vaqıt da öz tendentsiyalarnı ve moda qanunlarını qoya. Ve biz zemaneviy cemiyetke tabi olmağa mecbur olıp, Avrpa üslübindeki urbanı alamız. Tamam bu faktorlarnıñ tesiri qırımtatar medeniyetiniñ ğayıp olmasına yol aça, çünki medeniyetniñ terkibine kirgen qısımlardan biri etnik urbadır. Yazıq ki, bugün milliy urbada yürmege imkânımız yoq. Çoqusı insanlar başqalardan farqlı olmağa qorqalar, etraftakilerniñ laflarından saqınlar.

Bu meseleniñ çezilüvi ecdatlarımıznıñ qoyğan esası ola bile, ve bizim, yaşlarnıñ, borcumız – öz medeniyetine ürmet ve sevgi olaraq milliy urbanıñ elementlerini saqlamağa tırışmaq. Zemaneviy urbanı ananeviy kostümniñ elementlerinen birleştirmek mümkün. Meselâ, ilvanlar, quşaqlar, örnekler, olarnıñ episi tışqı körünişiñizge ayrı dülberlikni qoşarlar, böyle etip, kelecek nesillerimizge medeniyetimizniñ qısmını yetkize bilemiz.

Farqlı tedbirlerde, kontsertlerde çıqışta bulunğan şiyasiy erbaplar, yaşlar areketlerniñ liderleri öz kiyimlerinde milliy elementlerni qullanğanda yürek ğururnen tola.

Bu mesele üzerinde şimdi Qırım dizaynerleri ve ustaları faal çalışmağa başladılar, ve er şey yahşı tarafqa deñişecegine ümüt etemiz, amma kene de er şey bizge bağlı…

Riana ADABAŞ