Qırım şairi ve tercimanı edebiy mükâfat ile taqdirlendi

11.05.20160:19

Grigoriy Skovoroda adına halqara edebiy mükâfatı qırımtatar şair ve tercimanı Seyran Süleymanğa, ukrain klassikleri em de zemaneviy yazıcılarınıñ eserlerini tercime etkeni, ukrain ve qırımtatar edebiyatlarınıñ inkişafına em de munasebetlerini daa ziyade qaviyleştirilmesine isse qoşqanı içün berildi.

Mükafat laureatları arasında Ukraina MİA-sınıñ akademigi, Ukraina qaramanı İvan Dzüba, Şevçenko laureatı Valeriy Şevçuk, Lehistan, Makedonya, Serbiya ve İngiltereden kelgen şair ve nesirciler barlar.

Grigoriy Skovoroda adına halqara mükâfat 2005 senesi ‘Çernigov intellektual merkezi’ ve ‘Svitâz’ Volın teşkilâtı tarafından tesis etilgen edi.

Malümat içün. Seyran Süleyman – Ukraina Yazıcılarnıñ Milliy Birleşmesiniñ azası, Avrasiya Yazıcıları Birleşmesiniñ azası (Ankara), Bütündünya genç türk yazıcıları birleşmesiniñ azası (Baku), şiir, ikâye ve edebiy maqalelerden ibaret 3 cıyıntığınıñ müellifidir. Qırımtatar tilinde ondan ziyade kitapnıñ muarriri ve tercimanıdır. Mahmud Qaşğari adına halqara mükafatınıñ saibidir (Türkiye).