Kimsiñ sen – mankurt ya da vatanperversiñ?

11.05.20160:19

Hatırla, kimniñsiñ? Kimniñsiñ? Adıñ ne? Adıñ?

 

Afızasını coyğan, dünya ile ruhiy alâqaları olmağan insan, öz milliy mensüplligini ve öz milliy medeniyetini unutqan ya da nefret etken insan, insan adını taşımaq aqqını coya. O, insannıñ tek tışqı körünişini saqlap qala, özü ise ayvandan beter. O – MANKURTtır.

 

Sayğılı vatandaşlar!

 

Sürüügnlikte bizlerni pek yüksek derecede vatanperver, tertipli ve istidatlı bir halq olaraq tanıy ediler. Halqımız Vatan içün nasıl küreş alıp barmaq kerekligini bütün dünyağa kösterip, başqa halqlar arasında büyük ürmet qazanğan edi. Amma soñki 20 yıl içinde, Vatanımızğa qaytqanımızdan soñ, sürgünlikte qayıp olğan milliy zenginliklerimizni tiklemek yerine, ana tilimizni biile coyayatamız.

Halqımıznıñ millet olaarq saqlanıp qalmasını istegen vatandaşlarıma muracaat etem: bu, aqılğa sığmağan, masharalıq vaziyetinden qurtulmaq yollarını qıdırayıq!

Başqa milletlerge baqıñız. Eki ermeni, eki azerbaycanlı ya da eki er angi başqa millet vekilleri biri-birinen rastkelse, tek ana tilinde laf eteler. Özbekler qırımda yıllarnen yaşaylar, amma ne qırımtatar, ne rus, ne ukrain tiline kçemeyler, ep ana tilinde laf eteler. Çingenelerniñ devletçilikleri yoq, miliy mektepleri yoq, gazet-jurnal-radio-televizionları yoq, amma yüreklerinde milliy duyğu bar! Onıñ içün olar da özara tek ana tilinde laf eteler.

Böyle bir vaziyetni köz ögüne ketireyik. Hastahanede ekimniñ ögünde ölüm alında doğmuş anası yata. Oña kerek olğan ilâc yuqarı raflarnıñ birinde, biraz qolaysız yerde tura. Ekim, elini uzatıp, anasına o ilâcnı berip tursa, hastalıqnıñ mıtlaqa yeñilecegini bile. Amma, o, erinip, anasına qolay, yaqın bir yerde turğan zeerni berip tura. “Tek mañamı kerek o ana, menden ğayrı o qadar çoq soy-sopu bar onıñ. Menim aylığımnen stajım kesilmese, başqa bir şey kerekmey” dep tüşüne.

Menimcesine, böyle yapmaq tek yañlışlıq ya da eksiklik degil de, bu – cineyettir!

Bizim ana tilimizniñ şimdiki alı – şu ölüm alında olğan ananıñ alına beñzey. Bizler ise – anamıznı qurtaracaq ya da öldürecek ekimlermiz! Ana tilimizde laf etip, biz hastağa eyileşmesi içün, şifalı ilâc bergen kibi olamız. Aksi alda, yabancı til qullanmağa devam etip, hastağa ep zeer uzatqanlardan olamız!

Miliy mekteplerimiz, yuksek oquv yurtlarımız ve balalar bahçalarımıznıñ ocaları! Tilimizniñ baş ekimleri – sizlersiñiz! Başta bir özüñizden başlap, tek derslerde degil, teneffüslerde ve evleriñizde bile yalıñız qırımtatar tilinde laf etmek borclusıñız. Ondan soñ talebeleriñizden ve olarnıñ ana-babalarından qırımtatar tilinde laf etmekni talap etiñiz.

 Aynı şoyle vaziyet bizim bütün medeniy ocaqlarımızda da olmalı. Belli artistlerimiz, yırcı ve aktörlarımız! Sanadan Vatanımıznı sevmege çağırıp, ana tili aqqında o qadar güzel sözler aytıp da, sanadan tüşken soñ ep yat tilde laf eteseñiz – halqımızğa nasıl duyğular aşlarsıñız?

Milliy naşirlerimi radio ve televizion redaktsiyalarınıñ hadimleri! Siz ana tilimizni mükemmel bir şekilde bilesiñiz. Ana tilimizni qurtarmaq yolunda sizler de nümüne olmañız kerektir.

Özlerini millet içün areket etemiz dep köstergen siyasiy-içtimaiy teşkilâtlarımıznıñ yolbaşçı ve azaları! Areketleriñizniñ eñ esas ve qattı qanunlarından biri – ana tilinde laf etmek olmalıdır. Aksi alda, qalğan areketleriñizniñ can-yürekten çıqqanına işanç qalmay. Küçüñizni bir-biriñizge qarşı davalarğa sarf etmeyip, keliñiz, ana tilimizni qurtarmağa çalışayıq. Kösteriñiz, yüregiñizde ne bar, qoluñızdan ne kele.

Tıbbiyet merkezi, UKS Reskomnats, din cemiyetleri, sport birlikleri, şahsiy iş yerleri ve diger vatandaşlarımız çoqluqnen çalışqan birleşmelerniñ hadimleri! Tilimizni qurtarma işine qoşulıp, özara daima qırımtatarca laf etiñiz!

Elbette, tilimizni qurtarma işiniñ eñ esas meselesi – bütün camaatımıznıñ qorantalarında, soy-sop, qomşu ve tanış-biliş arasında kesen-kes yalıñız ana tilimizde laf etmek şartına bağlıdır. Epimiz bir kereden bir-birimizge tenbilep, tek ana tilimizde laf etmege tırışıp başlasaq, inşa-Allah, qısqa zaman içinde anda-mında tilimiz yañğırap başlar. Bir qaç ay içinde ise vaziyet büs-bütün yahşı tarafqa deñişir.

Sağ oluñız! Allah yardımcı olsun!

 

Bekir Umerov.

“Qırımtatarlarnıñ tez ve bütünley assimilâtsiyası içün”

bütünqırım partiyasınıñ

 

manifesti 

 

Ürmetli  vatandaşlar!

Öyle oldı ki, çoqumız Qırımda yerleştik: evimiz, maşinamız, aliy oquv yurtlarında oqumağa imkânımız, yüksek vazifelerde çalışmağa imkânımız bar.

Amma bizge tınç yaşamağa bermegen ekstremistler gruppası bar: nasıldır vatanperverlik, millet ve qırımtatar halqı genotsidniñ yüz biñlernen qurbanlarnıñ hatırası ögündeki borc, birisine kerek olmağan ana tili, milliy medeniyet ve müsülman dini aqqında aytalar.

Evelden qalğan bu fikirlerden qutulmaq ve öz vicdannı çekiştirmemek içün, “Qırımtatarlarnıñ tez ve bütünley assimilâtsiyası içün” bütünqırım partiyası qurula. Onıñ azası olmaq içün, qırımtatarlarğa ariza yazmaq, para bermek, toplaşuvlarğa barmaq kerekmey.

Nevbetteki qaidelerge riayet eterek onıñ azası ola bilesiñiz:

—                                  iç bir vaqıt qırımtatar tilinde laf etmeñiz, onıñ ögrenilmesi ve inkişafına qarşı çıqıñız. Havflıq altında olğan rus tilini qurtarıñız. Em de rus tilinde laf etmege alıştıq, bizge öyle qolay kele. Esası, aqılını çekiştirmek, unutula yatqan ana tilini hatırlamaq kerekmey;

—                                  İslam esaslarına riayet etmeñiz. Alkogol içkiler, afyon qullanıñız

—                                  bedeniñizni saqlağan milliy urbalarnı kiymeñiz,

—                                  qırımtatar folklorından “Fergana”, “sevgili Samarkand”, “tuvğan Taşkent” aqqında yırlarını seviñiz, anda dostlarıñız qaldı, siz ise yabancı Qırımda yüresiñiz;

—                                  doğğan balalarğa qırımtatar adlarını bermeñiz. Kommunistik ideallarını ebediyleştirgen o qadar yañı adlarımız peyda oldı. Eger Marlen, Vilen, Lenurlar ve başqa lenincilik adları yetişmese, Stalin ve Gitler mevzularnı inkişaf etmege mümkün, olar Leninden az farqlana ediler;

—                                  öz arañızda Qırımnıñ köy-şeerlerini tarihiy adları ile añmañız. Kiriş ve çıqışlarda olarnıñ adları añlayışlı belgilengenler: İvanovka, Traktornoye, Leninskoyeler…;

—                                  vatandaşlarıñız arasında öşekler tarqatñız, siz kibi yapmağan tuvğanlarıñıznı, dostlarıñıznı ve qomşularıñıznı nefret etiñiz;

—                                  qırımtatarlarını birlik ve beraberlikke çağırğan er birini qabaatlañız;

—                                  ğayrıdan tiklenilgen milliy öz-özüni idare etüv sisiteması – Qurultay ve onıñ organlarınıñ inkişafında iştirak etmeñiz. Çette turıp, onıñ açsanlıqlarına köstermege daa da qolay.

 

Ürmetli vatandaşlar!

Böyle tarzda biraz daa tursaq, ecdatlarımız tarafından biñlernen yıllar devamında yaratılğan er şeyni yoq etermiz, ve bir de bir bayraq altında bahtlı yaşamaqnı başlarmız!

 

“Qırımtatarlarnıñ tez ve bütünley assimilâtsiyası içün”

 bütünqırım partiyasına kirmege istegenler içün

areket yonelişini kösterilmesi boyunca koordinator

Bekir Umerov, tel: 050 4987968