Hizb-ut-Tahrir ve diger radikal teşkilãtlarınıñ faaliyeti ve qırımtatar halqı içün olarnıñ zararlı tesiri aqqında Qırımtatar Meclisiniñ Qararı

11.05.20160:19

Hizb-ut-Tahrir ve diger radikal teşkilãtlarınıñ faaliyeti ve qırımtatar halqı içün olarnıñ zararlı tesiri aqqında

Qırımtatar Meclisiniñ

Qararı

Qırımtatar halqınıñ şekillenüv devrinde Qırımda islamnıñ hanafi mazhabı darqatilğan edi. Asırlar devamında qırımtatarlar din ve ürf-adetlerine riayet ete ediler. Atta sürgünlik devrinde, kommunistik atteizmi hüküm sürgenine baqmadan, qartlarımız qırımtatarlar içün adetiy olğan islamnı saqlap qaldılar. Bütün bu vaqıt içersinde qırımtatarlarınıñ diniy dünyabaqışlarına diger çeşit aqıntılarınıñ tesir etilmesinden qaçınıldı.

Lãkin, qırımtatarlar Vatanına avdet etmege başlağanınen halqnıñ ayrı vekilleri SSSR dağılğanından soñra sabıq sovet devletler, şu cümleden Ukraina territoriyasına kirip kelgen radikal teşkilãtlarnıñ faaliyetine qoşulmağa başladılar. Böyle kibi teşkilãtlar faaliyetiniñ neticeleri ğayet zararlıdır: halq arasında biri-birine sabırsızlıq, duşmanlıq peyda ola, müsülman cemiyetleri, qorantalar dağıla ve il.

 

Böyle teşkilãtlarından biri Hizb-ut Tahrir siyasiy partiyası sayıla. Mezkür teşkilãt ‘Halifat qurulması oğrunda küreşinde müsülman ummetiniñ’ başında turmağa ğayret etmekteler. Hizb-ut Tahrir azaları qırımtatarlar kütken adetiy islam dini doğru degil, yani bizim ecdatlarımız pek yañlışa ediler dep sayalar. Bu fikir imanlı qırımtatarlar tarafından menfiy qabul etkeni tabiydir.

Bundan da ğayrı, Hizb-ut Tahrir firqası öz faaliyetinde Qırım müsülman diniy idaresine qarşı turıp, müftiyat tarafından tayin etilgen imamlarğa öz vazifelerini eda etmege keder eteler.

Faal teşviqat alıp barır eken ve diger usullarnen qullanıp, partiyanıñ azaları öz tarafdarlarınıñ sayısını arttırıp, Qırım camilerinde esas yerlerini almaq, müsülman cemiyetlerini öz tesirine tabi etmege tırışalar.

Hizb-ut Tahrir ve diger radikal teşkilãtlar faaliyetiniñ qırımtatar halqınıñ milliy menfaatları ve havfsızlığı içün zararını añlar ekenmiz, qırımtatarlarınıñ menfaatları ve haqları oğrunda küreşinde zorbalıqsız usullarını üstün tanıp, qırımtatar Meclisi qarar bere:

1. Regional ve yerli meclislerge yerli müsülman cemiyetlerinen birlikte Hizb-ut Tahrir ğayeleriniñ yayğınlanmasına ve firqa azalarınıñ Qırım müsülmanlar diniy idaresiniñ qararına qarşı olıp, camiler imamlarınıñ yerlerine turmalarına faal tarzda qarşılıq köstermek.

2. Regional ve yerli meclislerge yerli müsülman cemiyetlerinen birlikte qırımtatar ealisi, hususan yaşlar arasında añlatuv işlerini alıp barmaq.