Keçken rahatlıq künleri ‘Tatlı ses’ yañı qırım isitdatlarını tanıdı

11.05.20160:19

Keçken rahatlıq künleri Qırım öz istidatlı evlãdlarını tanıdı: ‘Tatlı ses’ belli bala konkursnıñ çoqtan beklenilgen üçünci finalı olıp keçti.

Finalğa 24 iştirakçi keçip, 6 yaşından- 12 yaşına ve 13 -17 yaşına qadar eki kategoriyanı teşkil ettiler. Bediy söz, oyun ve vokal kibi 3 nominatsıya boyunca ğaliplerni Server Kakuranıñ rehberligi altında juri tayin etti. Yarış iştirakçilerini finalğa mahsus ocalar, teatrimizniñ aktörları, icracılar, oyuncılar azırladılar. Olarnıñ arasında Asiye Saale, Seytabla Memetov, Dilãver Osmanov, Afize Kasarayeva, Maye Anafiyeva, Arzı Bekirova, Fatma Asanova, Aliye Temirkayayeva, Luiza Useinova ve dig. Eñ küçükler arasında bediy söz nominatsıyasında qırımtatar şiveleri aqqında meraqlı levhanı sanalaştırğan Ayşe Mustafayeva ve Elmaz Apseutova ğalebe qazandılar. Birisi Taraqtaş, digeri Kerç bitayçıqlarınıñ obrazını yaratıp, şivelerniñ farqlılığına baqmadan qırımtatarlar ep dost ve birlikte yaşağanlarını numayış ettiler. Yarışnıñ eñ yaş iştirakçisi Kamila Sakayeva er kesni ‘Balqurtçıq’ oyunınen ayrette qaldırıp, aynı bu nominatsıyasında ğalebege nail oldı. Hiç bir seyircini pervasız qaldırmağan gür sesniñ saibi Raziye Seytablayeva ise yarışnıñ eñ güzel yırcısı olaraq tanıldı. Ekinci gruppada ise juriniñ qararı ile bediy söz nominatsıyasında Niyara Bekirova, oyunda ise Cemile Calmambetova ğalip çıqtılar.

Yarış iştirakçilerinden ğayrı, gala-kontsertte bayramnı belli musafirler yaraştırdılar: Emine Cevdetova, Sevil Memetova, Asan Bilãlov, Aliye ve digerleri.

Konkurs İştirakçilerniñ episi Oleg Skripkanıñ "Країна мрій"(‘Hayal ülkesi’) festivalinde iştirak etecekler. Bütünukrain festivalinde iştirak etmek imkãnı, juri reisi Server Kakuranıñ aytqanına köre, artıq büyük ğalebe sayılır.

Bu acayip balalar bayramını azırlağan ATR telekanalınıñ teşkiliy işlerniñ yüksek seviyesini qayd etmek kerek. Canlı icra etken konkurs iştirakçilerine ‘Qırım’ ansambli zil tuttı.

Azize Abla

Foto Zarema Yalıböylü