Lvovda eykeltraş Ayder Aliyevniñ sergisi açıldı

11.05.20160:19

Lvov milliy sanat galereyasında sentãbrde qırımtatar eykeltraşı, Ukraina ve Qırımda nam qazanğan ressam, Şevçenko adına Ukraina milliy mukãfatınıñ laureatı Ayder Aliyevniñ sergisi açıldı.

Sergide 48 eser taqdim etildi. Olarnıñ arasında grafika, jıvopis, eykelcilik. ‘Lvovqa meni Şevçenko adına mukãfatnıñ laureatlarından biri-bestekãr Yuriy Lanük, mimar Viktor Marçenko ve ressam E.Beznissko davet ettiler. Olar daa 2007 senesi Lvovda maña şahsiy sergini teşkil etmege teklif etken ediler. Yaqın zamanda eserlerimi Kiyevge ve soñra Aqmescitke alıp ketirmege isteyim.’-haber etti Ayder Aliyev.

Eykeltraş ‘Avdet’ke serginiñ ğayesi nasıl peyda olğanı aqqında ikãye etti.

‘2007 senesi mayısta men Rovno şeerine Şevçenko adına milliy mukãfat laureatlarnıñ birinci assambleyasınıñ açılışına bağışlanğan sergide iştirak etmek içün bir qaç eserimi ketirgen edim. Taqdimnameden soñ, bestekãr Yuriy Lanük, mimar Viktor Marçenko ve ressam E.Beznissko maña Lvovda şahsiy sergini açmağa teklif ettiler. 2010 senesi Ukrainada nam qazanğan sanat erbabı Yuriy Lanükniñ daveti ve vilãyet medeniyet bölüginiñ destegi ile sergini azırlamağa başladıq.’

Malümat : Ayder Aliyev Mariysk ASSRde doğdı. 1968-1972 seneleri Taşkentte P.P.Benkov adına Cumhuriyet bediy oquv yurtunda oqudı. Tasilini Taşkentteki A. N.Ostrovskiy adına devlet teatr-bediy institutında devam etti.

1988 senesinden ressam SSSR ressamlar Birliginiñ, 1992 senesinden Ukraina ressamlar Birliginiñ azası ola. 1990 senesi Qırımğa kele. 2011 senesinden QMPÜ-nde tasviriy sanat kafedrasında çalışa. 2004 senesinden berli NAOMA qırım filialnıñ ocası. 25-ten ziyade sergilerde iştirak etti-Taşkent, Moskva, Leningrad, İrkutsk, Kiyev,Kazan, Türkiye, Macaristan, Qıbrız, Qırım şeerlerinde. Onıñ eykelleri Fergana, Aqmescit, Bağçasaraynı yaraştıra, bazı eserleri dünyanıñ çeşit muzey ve şahsiy kollektsiyalarında yer aldılar.

Elmara Mustafa